Komandante Jerál PNTL, Komisáriu Faustino da Costa hasai fotografia ho Xefe Operasaun Munisípiu (XOM) no Xefe Operasaun Distritál (SOD) iha Sentru Formasaun Polísia, Comoro, Dili. Imajen Tatoli/Eugénio Pereira

DILI, 10 dezembru 2020 (TATOLI)- Komandu Jerál Polísia Nasionál Timor-Leste (PNTL), ohin, iha Sentru Formasaun Polísia (CFP), Dili, realiza semináriu nasionál ho Xefe Operasaun Munisípiu (XOM) no Xefe Operasaun Distritál (SOD) hodi fó orientasaun kona-ba mudansa planu operasaun PNTL nian hodi minimiza konflitu no violénsia iha territóriu nasionál.

Notísia Relevante : Komisáriu Faustino hirus nia membru “tortura” povu

Komandante Jerál PNTL Komisáriu Faustino da Costa, hateten semináriu ne’e importante hodi Xefe Operasaun Munisípiu no Xefe Operasaun Distritál (SOD) bele rona diretamente orientasaun komandu nian hodi intende didi’ak planu operasaun no programa PNTL nian hodi fó atendimentu seguransa seguru ba abitante-sira iha idak-idak ninia area jurizdisaun.

Komisáriu Faustino dehan, bainhira XOM-SOD sira hala’o servisu no planu operasaun ne’ebé di’ak maka sei fó moris hakmatek ba komunidade hodi tau konfiansa boot ba polísia nia servisu.

“Ho kazu sira ne’ebé mosu ita tenke halo prevensaun hodi halo antesipasaun, no saida maka ita tenke atu halo iha patrullamentu, investigasaun no tránzitu ninian para redús problema iha fatin risku-sira ne’ebé PNTL identifika iha idak-idak ninia munisípiu,” Komisáriu Faustino hateten iha nia intervensaun.

Komandu PNTL rasik kria ona sistema ida balun naran Dasbord atu komandu operasaun PNTL kada munisípiu sira utiliza hodi hadi’a sistema servisu no planu operasaun-sira ne’ebé orienta membru-sira hala’o servisu tuir orientasaun Komandu PNTL nian.

“PNTL tenke haree área konflitu ba problema ne’e maka ida ne’ebé, para ita tau seguransa hodi evita no minimiza problema sira,” tenik nia.

Iha jullu 2020 liubá, Komisáriu Faustino rasik hasai despaxu sira hodi nomea portavós PNTL hodi hala’o funsaun bele rekolla informasaun hosi XOM-SOD kona-ba problema no akontesimentu-sira hodi Komandu PNTL fó sai ba públiku liuhosi órgaun ka meiu komunikasaun sosiál sira  atu sosiedade bele akompaña no hatene servisu PNTL nian.

PNTL presiza halo mós operasaun la’o ain tama sai bairru hamutuk ho Ofisiál Polísia Suku (OPS) koordena ho Konsellu Polisiamentu Komunitáriu (KPK) sosializa informasaun prevensaun no edukativu ba sosiedade atu koopera kria dame.

Iha semináriu ne’e kada komandante no xefe operasaun hato’o mós relatóriu levantamentu dadus fatin risku iha munisípiu, aprezentasaun regra operasaun nian no planu operasaun, diretiva operasaun no planu prioridade PNTL nian.

Semináriu ne’e hala’o fasilita  hosi Sentru Operasaun Nasionál SON/NOC no apoiu hosi Parseiru Dezenvolvimentu TLPDP.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here