IDN-TL ajuda konstrui tanki bee-moos fornese ba abitante-sira iha Aldeia Rileu, Suku Fada Bloko, Postu Administrativu Remexio, Munisípiu Aileu. Imajen/IDN-TL

DILI, 10 dezembru 2020 (TATOLI)- Institutu Defeza Nasionál Timor-Leste (IDN-TL) hala’o asaun karidade hodi ajuda konstrui tanki bee-moos hodi fornese bee-moos ba abitante-sira iha Aldeia Rileu, Suku Fada Bloko, Postu Administrativu Remexio, Munisípiu Aileu.

Programa IDN-TL ho naran, “Bee ba Liberdade ” IDN implementa hodi ajuda rezolve problema báziku bee-moos ne’ebé durante tinan barak abitante-sira enfrenta.

Bee-moos ne’e dada hosi área Mota-Laran sa’e ba foho leten ho distánsia kilómetru ida (1) hodi fornese ba abitante uma-kain 21 ho totál família 128  iha Bairru Tunubibi, Aldeia Rileu, Suku Fada Bloko.

Programa dada bee-moos ne’e hahú halo ona konstrusaun iha outubru liubá no sei inaugura iha sesta (11/12).

Diretór IDN  Capitão –De-Mar-E-Guerra, Donaciano Costa Gomes “Pedro Klamar Fuik”, liuhosi nota komunikadu ne’ebé Agência Tatoli asesu, ohin, hateten  perspetiva hosi programa “Bee ba Liberdade” implementa hodi promove servisu IDN nian hodi ajuda komunidade-sira.

Nia dehan, misaun IDN-TL la’ós fó de’it formasaun ba superiór PNTL no F-FDTL, maibé buka ajuda mós povu sira nu’udar responsabilidade umanu no sosiál.

Pedro Klamar Fuik  hatutan, alende fasilita ekipamentu hosi dada bee-moos, IDN ajuda konstrui tanki bee-moos tolu ne’ebé konstrui direita hosi populasaun-sira.

“Hein katak, projetu pilotu bee ba liberdade ne’ebé IDN konstrui bele hakmaan ona komunidade nia halerik ba bee-moos no sai solusaun di’ak ba governu para bele tau iha pratika realizasaun  objetivu dezenvolvimentu nasionál,” Pedro Klmar Fuik hateten.

ha fatin hanesan, reprezentante abitante Aldeia Rileu, Suku Fada Bloko, Luis Martins  hato’o agradese ba ajuda hosi IDN hodi tulun povu sira asesu ba bee-moos.

Nia rekoñese durante independénsia tinan 20 ona, populasaun-sira la hetan asesu ba bee-moos no sira ba kuru de’it bee-moos iha mota ho distánsia kuaze kilómetru ida.

Orsamentu ba konstrusaun no kanalizasaun bee-moos ne’e hetan apoiu hosi IDN inklui orsamentu hosi abitante sira rasik.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here