Estudante finalista FMCS halo juramentu. Imajen Tatoli//Rafy Belo.

DILI, 09 dezembru 2020 (TATOLI)—Estudante Finalista Fakuldade Medisina no Siénsia Saúde (FMCS, sigla portugés), Universidade Nacional Timor Lorosa’e (UNTL) kompostu husi estudante Eskola Superiór Medisina Jerál na’in 36 (mane 17, feto 19) no Parteira na’in 59 halo “Juramentu Profisionál”.

“Solenemente, ho prezensa Maromak nian iha Asembleia ida ne’e, jura, hodi dedika ha’u-nia vida profisionál iha servisu umanidade nian, respeita dignifika no direitu umana,” Estudante Finalista 95 jura tuir idaidak nia naran, perante inan-aman no konvidadu sira, iha Salaun Delta Nova, Dili, ohin.

“Sei ezerse kna’ar (Parteira no Médiku/a) ho konsiénsia no fidelidade, sei rai segredu ne’ebé iha, respeita ser umanu dezde konsepsaun to’o depois mate: la prátika aktu ne’ebé koloka ba risku integridade fízika ka psíkisa nu’udar umanu,” estudante sira ne’e jura tan.

Nune’e mós, estudante finalista FMCS na’in 95, liuhusi juramentu ne’e reforsa liután katak: “Sei hala’o hamutuk ho ekipa saúde hodi alkansa melloria nível vida populasaun nian, manten nafatin ideál profisaun sira nian, obedese ba preseitu (hanorin) étika nian, legalidade, morál no mós nia onra no tradisaun sira”.

Iha atividade akadémika ne’e, simultaneamente, estudante sira ne’e mós partisipa serimónia Judisium, nu’udar aktu ida hodi entrega formalmente títulu akadémiku husi estabelesimentu ensinu ba estudante sira bainhira estudu ona, entre tinan haat no lima, molok partisipa atividade graduasaun.

“Ha’u-nia parabéns rohan-laek ba ita-boot (estudante finalista) sira hotu,” Dekanu FMCS, José Dionísio kongratula finalista sira, iha ámbitu serimónia Judisiu Juramentu Profisionál ho tema Juramentu Profisionál nu’udar baze hodi responsabiliza no fiel ho komitmentu hodi fó asisténsia.

Akadémiku ne’e rekoñese katak estudante finalista sira ne’e nia susesu la sees mós husi ema seluk nia kontributu inkluzivamente dedikasaun profesór sira nian nune’e mós inan-aman ka enkarregadu sira.

Nia hatutan, inan-aman sira oferese ona sira-nia oan sira hodi partisipa iha ativa letiva hamutuk ho profesór sira iha universidade no to’o ona tempu entrega fila fali ba inan aman sira.

“Ohin ho laran luak, ami entrega fali ba ita-boot sira hodi simu sira hanesan graduadu ne’ebé profesionál atu serbi ita-boot sira no mós ema hotu ne’ebé hakarak hetan asisténsia liuhusi sira-nia liman badaen,” profesór universitáriu ne’e akresenta.

Kona-ba judisium, akadémiku UNTL ne’e hateten: “Judisium nu’udar tradisaun ida iha Universidade Nacional Timor Lorosa’e atu formalmente atribui títulu akadémiku ba alunu finalista sira tuir idaidak nia área”.

Iha fatin hanesan, Reprezentante estudante finalista sira, Nivia de Pina Sarmento Seran, liuhusi diskursu hato’o obrigadu no agradese ua’in ba inan-aman, estrutura universidade, tantu orizontál nune’e mós vertikál, ba dedikasaun, esforsu no responsabilidade tomak hodi sira atinji objetivu estudu.

Nune’e mós, hato’o deskulpa karik iha aktu ruma ne’ebé karik sira halo ofende sentimentu no seluktan.

“Karik durante formasaun hahalok ruma ne’ebé kontra regulamentu ruma ka hahalok ruma ofende profesór sira no ajente sira seluk karik ha’u lori kolega seluk nia naran hato’o deskulpa,” nia husu.

Reprezentante finalista na’in 95 ne’e kompromete katak sei hamutuk nafatin ho elementu sira iha universidade liuhusi orasaun no sei banati tuir ezemplu, orientasaun, ne’ebé mak sira simu tiha ona bainhira sei ativu iha ensinu aprendizajen.

Nivia mós lori finalista sira husi Eskola Superiór rua ne’ebé mak ohin partisipa iha atividade judisiu husi FMCS hato’o mós parabéns no votu susesu ba inan-aman, reitór no autoridade sira hotu.

Nia konklui, a ciência é alma das prosperiedade das nações (siénsia nu’udar klamar ba prosperiedade nasaun) husi Louis Pasteur, Kímiku francés (1822-1895).

Entretantu, entre estudante finalista na’in 95 ne’e, estudante na’in 16 mak hetan klasifikasaun exelente, 12 hetan di’ak liu ka muito bom no na’in neen hetan klasifikasaun di’ak ka bom.

Data ba graduasaun, Reitór UNTL Francisco Miguel Martins informa katak sei realiza iha loron 12 janeiru 2021.

Jornalista:Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here