DILI, 10 dezembru 2020 (TATOLI)-Sentru Estudu ba Pás no Dezenvolvimentu (CEPAD) implementa programa inisiativa liberdade asesu informasaun.
Komunikadu imprensa hosi CEPAD ne’ebé Agência Tatoli asesu, ohin, informa katak programa inisiativa liberdade asesu informasaun ne’e hetan finansiamentu hosi Uniaun Europeia iha Timor-Leste.
CEPAD hahú enkontru primeiru ho grupu traballu nasionál advokasia ba liberdade asesu ba informasaun, no iha tempu hanesan Diretór Ezekutivu CEPAD, João Boavida, asina akordu ho Diretora Arcoiris, Bella Galhos no Diretora Judicial System Monitoring Programme (JSMP), Ana Paula Marçal, hodi kontribui ba reforsa kontabilidade Governu nian ba Covid-19 liuhosi inisiativa liberdade no asesu ba informasaun iha Timor-Leste.
CEPAD fó suporta finansiamentu ba JSMP no Arcoiris atu hatán ba objetivu boot ne’ebé iha, nune’e bele suporta sosiedade sivíl atu sai ajénsia ba mudansa ho efetivu hodi promove direitu umanu.
Parseria kolaborasaun entre CEPAD no Arcoiris hala’o ho objetivu “Haforsa asesu ba prevensaun Covid-19 no redús impaktu ba komunidade LBT iha Timor-Leste” liuhosi atividade treinamentu ba membru LGBTIQ+ ba sira-nia direitu atu husu no simu informasaun kona-ba resposta ba Covid-19 no restrisaun ne’ebé iha no sei distribui mós hahán no fasilidade saúde ba família LGBTIQ + atu redús impaktu ekonomia hosi Covid-19 partikularmente iha Munisípiu Dili, Liquiça no Aileu ho montante orsamentu $49,775.
Objetivu parseria kolaborasaun entre CEPAD no JSMP mak “Hasa’e asesu ba informasaun ho atensaun partikulár ba sistema justisa formal no prosesu lejizlasaun inklui nia impaktu ba direitus umanus no demokrasia hodi hasoru krize Covid-19 no krize boot seluk iha futuru.”
Alvu ba kolaborasaun ne’e, fornese espesiál ba grupu-sira ne’ebé mak esperiénsia difikuldade atu asesu ba informasaun liuhosi promove komprensaun di’ak ba sistema justisa ba feto no komunidade marjinalizadu, partikularmente iha Baucau, Oe-Cusse no Suai ho montante orsamentu $50,000.
CEPAD hamutuk ho JSMP no Arcoiris sei organiza kampaña edukasaun públiku, kona-ba direitu sidadaun nian atu asesu ba informasaun ne’ebé loos nu’udar xave ba direitus umanus durante Covid-19
Jornalista : Nelson de Sousa
Editór : Francisco Simões
