Membru PN sira aprova alokasaun OJE 2021 ba instituisaun Estadu-sira. Imajen Tatoi/Egas Critovão

DILI, 10 dezembru 2020 (TATOLI)- Parlamentu Nasionál, ohin, aprova iha faze espesialidade alokasaun orsamentu Jerál Estadu (OJE) 2021 ba Sekretária Estadu Juventude no Desportu (SEJD) ho montante $9,476,147.

Hosi montante $9,476,147 ne’e, fahe ba kategoria saláriu no vensimentu rihun $584, bens no servisu millaun $1,861, transferénsia públika millaun $6,397, kapitál menór rihun $26 ho kapitál dezenvolvimentu rihun $609.

Liuhosi diskusaun iha espesialidade ne’e, membru PN-sira aprova ho votu a-favór 43, kontra 0 no abstensaun 0.

“Orsamentu ba SEJD pasa,” prezidente Parlamentu Nasionál, Aniceto Longuinhos Guterres, hateten hafoin votasaun espesialidade iha sala plenáriu Parlamentu Nasionál.

Maski nune’e, Deputadu sira iha Parlamentu Nasionál submete proposta atu aloka orsamentu  hodi finansia  kria lejizlasaun, hafoin reativa grupu arte-marsiál.

“Ami prevee ona orsamentu rihun $50 atu halo lejizlasaun ne’e ne’ebé la presiza aumenta tan tanba orsamentu ne’ebé ami propoin iha tinan fiskál 2021 ne’e ho baze ba programa prioridade sira,” Sekretáriu Estadu Juventude no Desportu, Abrão Saldanha afirma.

Programa medida prinsipál sektorál 2021 mak  realiza inisiativa promosaun juveníl  no  desportiva, pelumenus 10%,  ba timor-oan pratika atividade desportiva no kontribui atu redusaun envolvimentu  juventude  iha aktu violénsia no krime.

Halo esforsu redusaun  ba númeru joven  atu kazamentu sedu, gravidés no  joven ne’ebé sofre doensa kontájiu ba HIV/SIDA  no infesaun sexuálmente Transmissive (IST), aumenta envolvimentu juventude  ba prosesu  dezenvolvimentu ba setór hotu, redusaun taxa dezempregu.

SEJD mós foku ba asegura partisipasaun  ativa Timor-Leste  ba torneiu, kompetisaun desportiva no  jogu-sira iha nivel nasionál, rejionál no  internasionál, inklui  promove boa governasaun.

Jornalista   : Florencio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here