Plenaria PN hodi diskuti OJE 2021 iha faze espesialidade. Imajen Tatoli/Egas Cristovão

DILI, 10 dezembru 2020 (TATOLI)- Proposta Orsamentu Jerál Estadu (OJE) 2021 Ministériu Turizmu, Komérsiu no Indústria (MTCI) nian hamutuk $11,801,657 aprovadu ona iha espesialidade Parlamentu Nasionál atu bele foku ba programa prioridade tolu hanesan  turizmu komunitáriu, komérsiu no indústria.

Totál orsamentu MTCI $11,801,657, inklui $2,185,000 atu bele implementa atividade relasionada medida planu rekuperasaun ekonómika ne’ebé fahe ba kategoria saláriu no vensimentu $1,664,280, bens no servisu $7,283,777, transferénsia públika $2,468.000, kapitál menór $385,600 no kapitál dezenvolvimentu laiha.

Liuhosi diskusaun espesialidade iha PN, ohin, membru PN sira iha aprova orsamentu ba MTCI nian ho votu a-favór 40, kontra 0 no abstensaun 0.

Ba indústria, MTCI atu halo parke industriál iha Liquiça no sei prevee pakote hanaran ‘movimentu juventude incubator ba indústria’ hodi haforsa indústria ki’ik no médiu-sira.

Pakote ne’e sei loke ba área produtivu-sira seluk, hodi bele diversifika no haforsa área indústria-sira, la’ós ba area ida de’it maibé ba area hotu.

Ba komérsiu, MTCI hakarak inisia lei hodi reforsa area ne’e no prevee mós ba bem servisu. Kona-ba area turizmu, ministériu sei fó prioridade ba reabilitasaun sítiu turístiku hanesan Cristo Rei, reabilitasaun pouzada no uma turizmu sira iha área Metiaut ne’ebé komesa aat.

MTCI sei fó prioridade ba fatin turizmu komunitáriu iha Dili laran hodi hafurak fali sidade sai sítiu istóriku, liuliu prioridade turizmu komunitáriu atu haree ba sítiu turizmu komunitáriu iha Dili laran, atu hatuur Dili sai fali sidade istóriku ida ne’ebé maka sei sai prioridade turizmu ninian.

Programa medida prinsipál sektorál 2021 ba MTCI mak dezenvolve no promove Timor-Leste nia destinu turístiku atrativu no favoritu iha Ázia Pasífiku, promove  enkuadramentu legál setór turizmu,  dezenvolve infraestrutura turístika no fasilita kapasitasaun ba operadór turizmu. Nune’e mós dezenvolvimentu, regularizasaun no promosaun atividade komérsiu, define polítika komersiál no enkuadramentu legál ba área komérsiu, fortalese kooperasaun komersiál internasionál nivel bilaterál, rejionál no multilateral (kooperasaun bilaterál, rejionál no mundiál), fortalese kooperasaun no parseiru ho ajente ekonómiku.

MTCI mós promove polítika Nasionál Dezenvolvimentu Industriál Timor-Leste no dezenvolve no promove indústria nasionál atu substitui importasaun no promove boa governasaun no jestaun institusionál ho ministériu ne’ebé servisu dependente, fortalese instituisaun  no elevadu kapasidade rekursu umanu.

 Jornalista  : Florencio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here