Mapa Timor-Leste. Imajen/Espesiál.

DILI, 10 dezembru 2020 (TATOLI)—Proposta Orsamentu Jerál Estadu (OJE) ba tinan fiskál 2021 hosi autoridade munisipál haat (4) no administrasaun munsipál ualu (8) ho montante millaun $57.7 pasa iha espesialidade ho rezultadu votasaun a-favór 43, kontra 0 no abstensaun 0.

“Ho nune’e autoridade munisipál haat (4) no administrasaun munsipál ualu (8) pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kinta ne’e.

Bazea ba livru 3B (munisípiu sira) previstu polítika VIII Governu Konstituisionál aloka orsamentu própriu ba autoridade no administrasaun munisipál iha tinan 2021 hamutuk millaun $57.739 ne’ebé kompostu hosi saláriu vensimentu millaun $14.97, bens servisu millaun $13.06, transferénsia públika millaun $22.09, kapitál minór millaun $1.62 no kapitál dezenvolvimentu millaun $6.

Iha livru munisípiu ne’e sita mós totál despeza própriu hirak ne’e inklui ona orsamentu ba programa PDIM foun, subsídiu rihun $100 ba kada postu administrativu.

Montante orsamentu millaun $57.739 ne’e aloka ba autoridade munisipál haat (4) kompostu Baucau millaun $ 5,702, Bobonaro millaun $5,332, Dili millaun $9,059 no millaun $ 5,022 ba Ermera.

Nune’e mós  administrasaun munisipál ualu (8) kompostu hosi Aileu millaun $3,173, Ainaro millaun $3,672, Covalima millaun $4,679, Lautém millaun $4,416, Liquiçá millaun $3,600, Manufahi millaun $4,010, Manatuto millaun $4,568  no Viqueque millaun $4,507.

Livru 3B konsidera nu’udar dukumentu orsamentál ida-ne’ebé presiza informa ba públika kona-ba despeza Estadu ne’ebé kontribui ba dezenvolvimentu munispipál to’o iha nível suku inklui mós atividade sira implementa hosi nível nasionál no apoia finanseira hosi parseria dezenvolvimentu tuir ministériu/ajénsia.

Iha livru 3B ne’e fundamenta, atu kumpri implementasaun Planu Estratéjiku Dezenvolvimentu (PED) 2011-2030. Hosi ida-ne’e VIII Governu Konstitusionál realiza Roteiru ida-ne’ebe defini ona setór 3 (tolu) fundamentál mak dezenvolvimentu kapitál sosiál, ekonómiku no infraestrutura bázika inklui setór Institusionál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here