Segundu Komandante Polísia Munisípiu Dili, Superintendente Euclides Belo. Imajen Tatoli/ Antonio Goncalves

DILI, 09 dezembru 2020 (TATOLI)- Komandu Polísia Munisípiu Dili servisu hamutuk ho Servisu Investigasaun Kriminál (SIC) halo ona investigasaun ba kazu oho malu entre parte família balun ne’ebé rezulta vítima Ricardo Aparicio mate fatin.

Vítima Ricardo hetan oho hosi nia família, suspeitu ho inisiál AMX iha vítima nia uma Suku Manleuana, Dili durante rai udan boot, tersa kalan (08/12).

“Ita halo ona investigasaun ba tipu krime ida ne’ebé akontese iha área Manleuana, Dili, ne’ebé rezulta sidadaun mane ida mate, parte PNTL ho autoridade-sira halo kedas atuasaun, no pesoál ne’ebé suspeita ba krime ne’e PNTL detein ona,” dehan Euclides Belo ba jornalista, ohin, iha Komandu PNTL, Caicoli, Dili.

Euclides Belo dehan, parte PNTL Dili asegura ona suspeitu AMX, maibé prosesu investigasaun kle’an ba kazu ne’e Servisu Investigasaun Kriminál maka lidera hodi rekolla evidénsia-sira.

Mate isin Ricardo Aparicio, parte SIC lori ona ba Ospitál Nasionál Guido Valadares (HNGV) hodi halo autópsia.

Parte PNTL rasik seidauk bele fó sai kronolojia loloos hosi kazu oho-malu ne’e, tanba sei rekolla hela dadus hosi sasin balun no família kona-ba problema interna entre família ne’ebé rezulta vítima ne’e mate.

Detein joven na’in- sia

Iha parte seluk, Superintendente Euclides Belo, informa, daudaun ne’e PNTL detein mós suspeitu joven na’in-sia (9) iha Sela PNTL, Caicoli, Dili, tanba envolve fa’an fogete ilegál no kazu krime asaltu iha área Comoro nian.

Nia dehan, prosesu investigasaun ba suspeitu sira ne’e sei hala’o durante oras 72 sei aprezenta ba Ministériu Públiku.

Iha parte seluk, PNTL Dili mós sei kontinua halo nafatin operasaun iha sidade Dili hodi evita kazu krime-sira inklui operasaun ba fogete ilegál.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here