Segundu Komandante Polísia Munisípiu Dili, Superintendente, Euclides Belo. Imajen Tatoli/Eugénio Pereira

DILI, 09 dezembru 2020 (TATOLI)- Udan-boot ne’ebé akontese iha Dili, tersa loraik to’o kalan, hamosu inundasaun maka’as iha  edifísiu Polísia Eskuadra Don Aleixo, Aimutin, Dili.

Bee-lihun merak  no fo’er tama borus sala sira servisu Ekuadra Polísia Aimutin nian, ho nune’e, iha kuarta ohin, membru polísia-sira ne’ebé destaka iha Eskuadra Polísia Aimutin tenke sakrifika-aan hodi servisu iha “debu-laran” ka bee-nalihun laran.

Segundu Komandante Polísia Munisipiu Dili, Superintendente, Euclides Belo, hateten mezmu bee tama to’o servisu fatin-sira, maibé membru polísia-sira ho pasiénsia tenke servisu nafatin hodi hamoos tahu iha sala servisu fatin.

Euclides rekoñese problema ne’ebé Polisia Eskuadra Aimutin no Komandu Polisia Munisipiu Dili enfrenta la’ós problema foun, maibé problema antigu, tanba bainhira udan-boot  sempre mosu inundasaun.

“Udan-boot horiseik ne’e halo bee tama Eskuadra Polisia Aimutin, Don Aleixo nian, tanba udan-boot ona, ami nia membru-sira sente hanesan familiár ona, tanba sira tenke preparadu atu hamoos bee no tahu-nurak ne’ebé tama nakonu iha servisu fatin,” Euclides Belo, ohin, hateten ba jornalista iha Komandu PNTL, Caicoli, Dili.

Durante udan, Komandante PNTL, Superintendente Xefe, Henrique da Costa no Segundu Komandante Superintendente, Euclides Belo, hala’o vizita diretamente hodi fó solidariedade ba membru-sira hodi ajuda dasa-sai bee no tahu-nurak sai hosi edifísiu laran.

Inundasaun ne’ebé akontese halo liña eletrisidade mate, maibé membru-sira hala’o nafatin atendimentu ba komunidade-sira ne’ebé hato’o keixa.

Hahú kedas iha tinan 2012 to’o 2020 ne’e, Komandu PNTL Dili halo ona relatóriu hodi aprezenta problema ba Komandu Jerál PNTL atu halo konstrusaun ba edifísiu PNTL Aimutin, maibé too’ agora Governu seidauk fó resposta, tanba orsamentu la iha.

Euclides dehan, durante udan-boot sira nia parte hetan kontaktu mós hosi populasaun sira ne’ebé hela iha área Masin-Lidun-Tasi Tolu, Manleuan, Becora, hetan apoiu hosi Ofisiál Polísia Suku (OPS) ho autoridade sira hodi ajuda komunidade sira ne’ebé bee tama sira-nia uma.

PNTL rejista keixa hosi komunidade kona-ba ai-boot ida iha área Tasi Tolu monu rezulta ema balun ain tohar, no fiu eletrisidade kotu iha área IOB, Pantai Kelapa no parte tékniku EDTL no Bombeiru halo kedas atuasaun hodi ajuda komunidade-sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here