Imajen/Media PN.

DILI, 09 dezembru 2020 (TATOLI)—Parlamentu Nasionál (PN), kuarta ne’e, aprova proposta adisionál ho montante rihun $157 inklui asegura saláriu décimo terceiro (gaji 13) hodi asegura eis funsionáriu RTTL na’in-37.

Rezultadu votasaun ba proposta ka verba adisionál ho númeru 35 ne’e a-favór 36, kontra 3 no abstensaun 5.

“Ho nune’e proposta 35 pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kuarta ne’e.

Proponente ba proposta ne’e mak deputadu Joaquim dos Santos “Boraluli”, Adriano dos Nascimento, Luis Roberto da Silva, Francisco de Vasconcelos, Francisco Miranda Branco no deputada Olinda Guterres.

Justifikasaun sumária hosi proponente sira katak, proposta adisionál montante rihun $157 iha kategoria saláriu no vensimentu ho justifikasaun orsamentu rihun $144,369 ne’e hodi asegura pagamentu ba sálariu no vensimentu ba funsionáriu eis funsionáriu RTTL na’in- 37 inklui eis funsionáriu RTTL na’in-4 ne’ebé destaka iha Parlamentu Nasionál.

Hosi verba adisionál rihun $156,295 (rihun $157) ne’e inklui orsamentu rihun $11,926 hodi asegura saláriu désimu terceiro (gaji 13) ba funsionáriu hirak ne’e.

Servidór estadu na’in-37 ne’e sai hosi RTTL bainira televizaun públiku ne’e nakfilak ba Empreza Públika (EP) nune’e sira hili funsaun públiku.

Komisaun A (Justisa no Konstitusionál) lideradu Deputadu Joaquim dos Santos ‘Boraluli’ rekomenda ba Ministériu Finansa (MF) atu halo transferénsia verba adisionál rihun $140,825 hosi rúbrika dotasaun todo governu hodi asegura pagamentu saláriu no vensimentu ba funsionáriu destakadu RTTL na’in-33 no aumenta na’in-haat (4) entaun halo orsamentu sa’e ba rihun $144,369 .

Iha relatóriu no paresér Komisaun A nian rekomenda ba Ministériu Finansa transfere verba adisionál ho montante rihun $144,369 hosi rúbrika Dotatasaun todo Governu ba orsamentu Komisaun Funsaun Públika nian hodi asegura pagamentu saláriu no vensimentu ba funsionáriu na’in-37 ne’e.

Prezidente Komisaun A, Deputadu Joaquim dos Santos “Boraluli” rekomenda ba Ministériu Finansa no Komisaun Funsaun Públika (KFP) atu transfere verba adisionál ho montante rihun $157 n’e ba funsionáriu na’in-37 ne’ebé durante ne’e destakadu iha Sekretaria Estadu Komunikasaun Sosiál (SEKOMS) no fatin seluk ba ministériu ne’ebé funsionáriu ida hala’o kna’ar ba.

Nune’e Primeiru-Ministru Taur Matan Ruak no Ministru Finansa, Rui Gomes mós konsidera proposta adisionál ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here