Edifisiu Parlamentu Nasional,Imajen/Antonio Goncalves

DILI, 09 dezembru 2020 (TATOLI)—Parlamentu Nasionál (PN), ohin, aprova ona dotasaun todo Governu $225,985,899.00 iha espesialidade inklui millaun $6 ba pensaun eis-titulár no eis-membru órgaun soberania sira.

“Ho nune’e orsamentu dotasaun todo Governu (dotasaun Governo tomak) pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kuarta ne’e.

Hosi montante orsamentu dotasaun inisiál $228,532,553.00 hasai millaun $2,546,655 hosi fundu kontinjénsia no totál orsamentu todo Governu hela $225,985,898.00.

Dotasaun todo Governu kompostu hosi saláriu no vensimentu rihun $700, bens no servisu $47,312,103.00, transferénsia públika $177,896,875.00, kapitál minór rihun $176,890 no kapitál dezenvolvimentu 0.

Hosi montante $225,985,898.00 ne’e koloka ba fundu kontrapartida millaun $8,500, auditoria esterna rihun $500, rezerva fundu kontinjénsia millaun $26,310 maibé rezerva fundu kontinjénsia hetan alterasaun entaun hela $23,763,372.00, kuota membru Governu instituisaun internasionál millaun $3,860.N

Nune’e mós millaun $6 ba pensaun eis-titulár no eis-membru órgaun soberania millaun $6 no provizaun ba servisu legál sira millaun $8,100.P

Provizaun ba RAEOA-ZEESM millaun $29,243, provizaun hodi apoia konferénsia episkopál millaun $15, kontribuisaun estadu ba rejime kontributivu seguransa sosiál millaun $58, 254, apoia atividade CPLP rihun $500 no apoia finanseiru internasionál millaun $2,500.

Iha biban ne’e, deputadu sira mós aprova provizaun ba kapitalizasaun Banku Nasionál Komérsiu Timor Leste (BNCTL-sigla portugés) millaun $40, previzaun ba kapitalizasaun Banku Sentrál Timor Leste (BCTL-sigla portugés) millaun $10 no provizaun ba ofisina manutensaun veíkulu Governu nian rihun $991.

Nune’e mós aprova provizaun ba pagamentu empréstimu sira millaun $12,500, provizaun ba diagnóstika saúde millaun $2, provizaun ba projetu integradu dezenvolvimentu aeroportu Dili rihun 649, provizaun ba projetu integradu Cristo Rei rihun $25, provizaun sensu populasaun millaun $3,100, provizaun ba lina kréditu universidade privada millaun $2,500, provizaun viajen estranjeiru millaun $4,823 no provizaun adezaun ba ASEAN rihun $500.

Alokasaun orsamentu kada programa

Programa ho kódigu 148 ko-ba kontinjénsia millaun $26,310, polítika ekonómika sei gasta ho kódigu programa 150 sei gasta millaun $50, programa kódigu 328 (apoiu ba sosiedade sivíl prevee millaun $15, programa 346 kona-ba estatístika no polítika ekonómika sei gasta millaun $3,100, programa 350 kona-ba mobilizasaun no jestaun rekursu esternu prevee millaun $13,149, programa 352 kona-ba jestaun finanseira no ativu sira prevee orsamentu rihun $991.

Nune’e mós programa 400 kona-ba polítika esterna RDTL nian prevee rihun $500, programa 510 kona-ba boa governasaun no jestaun institusionál previstu millaun $31,960, programa 511 kona-ba organizasaun urbana previstu rihun $25, programa 577 kona-ba sistema integradu protesaun sosiál prevee millaun $15,500, programa 022 kona-ba transferénsia orsamentu seguransa sosiál previstu millaun $42,754 no programa ho kódigu 099 kona-ba transferénsia orsamentu ba RAEOA millaun $29,243.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here