Movimentu Universitariu Timor-Leste.Imajen/Tome Amado.

DILI, 09 dezembru 2020 (TATOLI)—Movimentu Universitáriu Timor-Leste (MUTL), la satisfas ho desizaun husi Sekretáriu Estadu Formasaun Profesionál no Empregu (SEFOPE) ne’ebé kansela traballadór Timoroan na’in haat hodi ba servisu iha Austrália.

Governu liuhusi SEFOPE iha loron 02 fulan-dezembru 2020 semana kotuk tuir loloos haruka traballadór 162 ne’ebé liu ona selesaun vaga Seasonal Worker Programme (SWP), hodi bá servisu Tazmánia, Austrália ho Qantas Airlines iha tuku 08:30 dadeer.

Notísia Relevante :Kanselamentu viajen traballadór, SEFOPE: “ami la halo intervensaun nein desizaun”

Maibé na’in haat kanseladu tanba falla iha dokumentu komprovativu hanesan viza traballu Austrália mate, atestadu médiku, no  identidade, sistema aviaun la deteta sira-nia naran.

Portavóz MUTL José Lino, iha konferénsia imprensa ohin iha Kampus Sentrál UNTL Caicoli Dili, husu Sekretáriu Estadu Profesionál no Empregu atu klarifika loloos kazu kansela Traballadór Timoroan ba Austrália tanba deklarasaun SEFOPE nian iha loron 03 fulan-dezembru 2020 konsidera la konvense públiku.

“Ami MUTL la satisfas ho desizaun SEFOPE,” dehan nia kuarta ne’e.

MUTL propoin atu halo dialogu ho SEFOPE hodi hetan esplikasaun loloos ba kazu ne’e ho transparansia tanba deskonfia mosu injustisa iha prosesu ne’e.

Daudaun ne’e Movimentu Universitáriu Timor-Leste (MUTL) rekolla ona dadus balun kona-ba kazu ne’e hodi aprezenta ba Governu atu fó tratamentu hanesan ba sidadaun.

“Ami iha dadus kona-ba dokementus traballadór sira-nian ne’e liliu iha sira-nia viza balun sei mate iha 2021 no balun nian sei to’o 2023 dehan sistema aviaun la simu ka deteta viza traballadór sira nian ne’e parese SEFOPE halo ona manipulasaun karik,” nia esplika.

MUTL konsidera desizaun SEFOPE ne’e sei aumenta númeru dezempregu iha rai-laran, tanba tuir dadus husi Diresaun Nasionál Estatístika 2019 nian hatudu joven ho idade 23 kuaze pursentu 30 maka laiha servisu.

“Ita mós bazeia ba dadus ne’ebé fo sai iha relatóriu multidimensial property index (MPI) iha TL kuaje populasaun ho pursentu 41,8 mak sei moris iha k’ak ho pursentu ida ne’e mak kategoria pursentu 30 kuaze joven de’it tanba laiha servisu,” nia reforsa.

Notísia Relevante :Kanselamentu viajen traballadór, SEFOPE: “ami la halo intervensaun nein desizaun”

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here