Ministru Edukasaun Juventude no Desportu Armindo Maia entrega ekipamentu estra-kurikuler ba ESGTV 16.Imajen/Tome Amado.

DILI, 09 dezembru 2020 (TATOLI)—Ministériu Edukasaun Juventude no Desportu (MEJD), kuarta ne’e entrega ekipamentu extra-kurikulér hanesan band aka drum band, uniforme no komputadór ba eskola ensinu sekundária jerál no tékniku vokasionál hamutuk 16 iha rai-laran.

Ministru Edukasaun Juventude no Desportu, Armindo Maia, hafoin simbolikamente entrega ekipamentu  ba dirijente Eskola ESJ 4 Setembru UNAMET Dili, ESTV 28 Novembru Becora no ESTV Leorema iha salaun MEJD husu atu  jere no uza ekipamentu ne’e ho koidadu no responsabiliza ba interese eskola nian.

Nia esplika durante ne’e Governu liuhosi MEJD foin apoiu ekipamentu drum band ho uniforme ba ESG Viqueque maibé eskola seluk seidauk.

“Tinan ida ne’e besik ramata Governu  apoiu drum band kompletu ho farda ba eskola ensino sekundária públiku no tékniku vokasionál hodi nune’e sira bele prepara an ho didiak atu bele partisipa iha atividade eskola nian,” Armindo Maia, dehan.

Diretór Jerál Ensinu Sekundária, Deolindo da Cruz, informa Governu apoiu ekipamentu hirak ne’e suporta atividade estra-kurikulér estudante sira-nian.

“Durante ne’e eskola privadu sira mak sempre kompete maibé eskola públiku nunka tan ne’e Governu hakarak apoiu ekipamentu sira ne’e hodi nune’e iha atividade Ministériu nian eskola públiku mós bele partisipa,” katak nia.

Ekipamentu hirak ne’e sosa ona iha tinan 2019 no rai iha armazén Ministériu Edukasaun Juventude no Desportu.

“Distibuisaun ne’e sei halo fazeadamente hahú segunda semana oin ne’ebé sei toma konta husi dirasaun lojístika nian. kada eskola ida sei hetan pakote ida. Portantu komputador ne’ebé sei distribui ne’e purvolta 71 ne’ebe sei distribui de’it ba eskola tékniku vokasionál 28,” nia hateten.

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here