Ministru Prezidénsia Konsellu Ministru, Fidelis Manuel Leite Magalhães. Imajen TATOLI/António Gonçalves

DILI, 09 dezembru 2020 (TATOLI)-Ministru Prezidénsia Konsellu Ministru (PCM), Fidelis Manuel Leite Mangalhães, hateten luta kontra korrupsaun iha Timor-Leste  nu’udar luta nivel Estadu nian.

Notísia Relevante : CAC lansa planu estratéjiku 2021-2025

Nia hateten, vontade polítika, hanesan Governu, atu halo nia parte iha luta ida-ne’e no atu garante apoiu ne’ebé nesesáriu no kolaborasaun institusionál ba Komisaun Anti-Korrupsaun (CAC) no entidade-sira seluk ne’ebé iha responsabilidade iha área ida-ne’e.

Nia afirma tan, tenke tau atensaun mós ba intensifikasaun atividade  CAC nian iha ninia misaun atu atua hodi prevene no hodi hapara aktu korrupsaun iha nia forma oioin. Lori preokupasaun no perspetiva  VIII Governu  Konstitusionál nian kona-ba hahalok aat ho dimensaun mundiál ida-ne’e no ne’ebé atinje mós país ida-ne’e.

“Iha Timor-Leste mós, luta ida-ne’e tenke la’o tuir perspetiva ne’ebé globál liután, kruza setór Estadu tomak no tanba ne’e, kombate hasoru korrupsaun labele sai hanesan dezafiu ida-ne’ebé fó ba  CAC mesak de’it, maibé órgaun Estadu hotu-hotu nune’e mós atór polítiku-sira seluk no sosiedade sivíl, setór públiku no privadu tenke hamutuk ho  CAC atu nune’e kombate ida-ne’e bele efetivu liután no sai nu’udar luta nasaun tomak nian duni,” Ministru Fidelis Maneul Leite Mangalhães hateten iha nia diskursu iha ámbitu komemorasaun loron internasionál Anti-Korrupsaun, ohin, iha salaun Lalini Larguto, Edifísiu   CNE, Colemera, Dili.

Notísia Relevante : 2020, CAC rejista kazu korrupsaun 68

Nia hato’o saudasaun ba CAC no ninia membru no funsionáriu-sira hotu no fó aten-barani ba sira hodi kontinua ho empeñamentu bainhira hala’o funsaun-sira, no buka liután efikásia no impaktu loloos hosi atividade-sira.

Iha loron 9 dezembru,  kada tinan, nu’udar loron Internasionál Kontra Korrupsaun nian Nasoins Unidas sempre fó hanoin mai ema hotu kada tinan kona-ba dimensaun no impaktu negativu oioin hosi prátika korrupsaun.

Ministru Fidelis Maneul Leite Mangalhães, haktuir, estimativa tinan kotuk, kuaze dolar billaun (bilhão) 2,6 mak ema na’ok liuhosi korrupsaun, ne’ebé korresponde ba 5% hosi PIB globál. Hosi dolar billaun (bilhão) 2,6 ne’e, dolar billaun (bilhão) ida hodi selu hanesan subornu, ida-ne’e signifika katak rekursu lubuk boot mak ema hasai hosi karteira investimentu públiku-sira iha edukasaun, saúde, benefísiu sosiál-sira no dezenvolvimentu ein-jerál.

“Ida-ne’e ninia efeitu maka hamenus “asesu ba rekursu no oportunidade sira” maibé mós hamenus konfiansa ba instituisaun públika-sira no ba polítiku sira,” Fidelis afirma tan.

Nia dehan, tanba ne’e Sekretáriu Jerál Nasoins Unidas, António Guterres, nota katak, iha mundu tomak, sidadaun sira sai “hirus liután” ho situasaun ne’e. Hahú kedas hosi tinan 2018, “Transparénsia Internasionál” alerta ba katak esforsu anti-korrupsaun paralizadu iha país barak no ida-ne’e determina reasaun maka’as hosi sosiedade sivíl nune’e mós deskonfiansa ba sosiedade polítika, partidu polítiku-sira no ikusliu iha demokrasia.

“Ha’u repete iha ne’e, iha mundu tomak luta ne’ebé iha susesu kontra korrupsaun tenke asume la’ós de’it iha ninia vertente kombate krime nian, maibé mós luta ne’e rasik hanesan instrumentu importante ida ba reforsu no kredibilidade Estadu nian no ninia instituisaun demokrátika sira,” hateten Fidelis.

Nia hatutan, iha Timor-Leste mós luta ida-ne’e tenke la’o tuir perspetiva ne’ebé globál liután, kruza setór Estadu tomak no tanba ne’e, kombate hasoru korrupsaun labele sai hanesan dezafiu ida-ne’ebé fó ba  CAC mesak de’it, maibé órgaun Estadu hotu-hotu nune’e mós atór polítiku-sira seluk no sosiedade sivíl, setór públiku no privadu tenke hamutuk ho  CAC, atu nune’e, kombate ida-ne’e bele efetivu liután no sai nu’udar luta nasaun tomak nian duni.

Fidelis Leite Mangalhães, fó hanoin fila-fali katak relatóriu ekonómiku Banku Mundiál nian kona-ba Timor-Leste, iha outubru 2019, hateten katak korrupsaun sai hanesan obstákulu boot ida ba atrasaun no dezenvolvimentu ambiente negósiu nian iha país ne’e.

Iha realidade, nia tenik,  besik porsentu 44 hosi empreza-sira ne’ebé entrevistada konfirma katak ema husu sira atu selu buat ruma, ho osan ka ho vantajen seluk ruma, atu nune’e, sira bele hetan asesu no interasaun ho servidór públiku ruma.

“Hirak-ne’e, infelizmente, hanesan dadus baze balu: kona-ba dadus sira-ne’e ita tenke kontinua halo asaun hodi muda tomak realidade ida-ne’e,” tenik nia.

Nia hateten, iha fulan hirak ikus ne’e, fó ona pasu boot iha diresaun ida-ne’e ho  aprovasaun foin daudaun ne’e, ho unanimidade, hosi Parlamentu Nasionál no publikasaun tuirmai Lei n. 7/2020, loron 26 fulan-agostu, kona-ba medida-sira ba Prevensaun no Kombate hasoru Korrupsaun, ne’ebé inklui kontrolu efetivu ba rendimentu hosi ema hirak ne’ebé okupa kargu públiku-sira.

Ministru PCM, Fidelis Leite Mangalhães, dehan adosaun hosi Governu ba programa reforma administrasaun públika 2019-2023 ne’ebé kontinua hadi’a funsionamentu servisu públiku sira-nian, hodi buka atu reforsa transparénsia, prestasaun konta no posibilidade ba kontrolu sosiál, liuliu hosi governasaun eletrónika no tau iha detalle prosedimentu no responsabilidade sira no agora ho elaborasaun Planu Estratéjiku Komisaun Anti- Korrupsaun (PEKA) tinan 2021-2025 no ninia lansamentu .

Iha sorin seluk, nia dehan, to’o agora harii ona iha Timor-Leste  entidade oin-oin ho kompeténsia atu halo intervensaun tantu iha prevensaun, nune’e mós iha kombate hasoru hahalok fraudulentu no korrupsaun. Aleinde CAC no Ministériu Públiku no  mós Polísia Nasionál, Polísia Sientífika no Investigasaun Kriminál, Inspesaun Jerál Estadu nian no Provedoria Direitus Umanus no Justisa. Tanba ne’e tenke konkorda katak agora ne’e tempu atu halo asaun, hatudu rezultadu-sira no hetan impaktu.

“Ha’u kompriende katak iha impulsu ba asaun ne’e, ita mós tenke garante katak kompeténsia instituisaun ida-idak nian tenke klaru atu labele iha sobre pozisaun kompeténsia ka iha kompeténsia ruma maka lakon. Tanba, selae bele iha kakofonia, dispersaun no ita la iha efisiénsia no efikásia”.

Nia parte dezeja servisu di’ak ba hotu-hotu no hein katak iha tinan oin iha tempu hanesan daudaun ne’e bele ona ko’alia kona-ba rezultadu no asaun barak liután iha prevensaun no kombate hasoru korrupsaun iha Timor-Leste.

“Ida-ne’e maka sidadaun-sira hein hela no ba ida-ne’e mak ita hotu tenke kontribui ho asaun institusionál no atitude individuál oin-oin,” afirma Fidelis Magalhães.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here