Prezidente LANAMONA, Domingas dos Santos. Imajen/Espesiál.

DILI, 09 dezembru 2020 (TATOLI)—Kooperativa Lakon Nakukun Mosu Naroman (LANAMONA) iha ona kapitál miliaun $1,047.000.00 ho nia membru etinje 1700.

“Ami halo ona aprezentasaun, iha outubru nia rohan ami-nia kooperariva iha ona osan millaun $1-resin ho nia membru 1700,” Prezidente LANAMONA, Domingas dos Santos, hateten ba jornalista ajénsia TATOLI hafoin halo sorumutu ho Sekretáriu Estadu Kooperativa Elizário Ferreira iha Sentru Hanai Malu, Bairru-Pité, Dili, kinta ne’e.

Prezidente LANAMONA hatutan, oras ne’e daudaun kooperativa ne’e la’ós de’it iha Bobonaro maibé loke ona liras ba munisípiu sira.

“Ami la’ós ona iha Maliana de’it, maibé ami tama ona iha munisipiu Likisá, Aileu, Ermera no Dili. Agora daudaun ami halo ona konstrusaun edifísiu Dili nian ho andar tolu.  Se laiha obstákulu, fulan Abríl ami halo ona inaugurasaun ba sentru kooperativa LANAMONA iha Dili. Oras ne’e iha ona sentru 39 iha munisípiu lima ne’e, ho postu sia inklui  iha suku 27. Maliana rasik iha sentru kooperativa  29,” Prezidente LANAMONA hateten.

Nia hatutan, kooperativa kréditu LANAMONA oras ne’e daudaun halo formasaun ba membru sira oinsá faan osan no sosa osan kréditu, ajuda buka solusaun ba membru sira-ne’ebé iha difikuldade atu selu no serbisu hamutuk ho voluntáriu sira fó treinamentu ba agrikutór sira.

Entertantu, kooperativa LANAMONA hahú eziste iha 2004 ho naran “fó liman” ho osan atus $3 no iha tinan 2008, osan ne’e sa’e ba rihun $7, ikus mai halo asembleia estraordinária deside muda naran ba kooperativa kréditu Lakon Nakukun Mosu Naroman (LANAMONA).

Jornalista: Natalino Costa

Editór: Cancio Ximenes

HAKEREK NO HATÁN

Please enter your comment!
Please enter your name here