Ministru Finansa, Rui Gomes. Imajen Tatoli/Domingos Piedade

DILI, 09 dezembru 2020 (TATOLI)- Governu liuhosi Ministériu Finansa (MF) no Banku Sentrál Timor-Leste (BCTL) planeia atu halo avaliasaun ba  efeitu ekonómiku hosi empréstimu ne’ebé Banku Nasionál Timor-Leste (BNCTL) oferese ba Timor-oan liuliu setór privadu nasionál.

Notísia Relevante : PD propoin aumenta millaun $40 kapitaliza BNCTL

Logotipu BNCTL

Ministru Finansa, Rui Gomes, hateten iha OJE 2021, Governu aloka  millaun $40 atu kapitaliza BNCTL no BCTL hodi fasilita fó kréditu ba Timor-oan  liuliu setór privadu.

“Ami  nia sujestaun katak di’ak liután ita halo estudu avaliasaun ida la’ós de’it Ministériu Finansa, maibé mós ho BCTL no BNCTL atu haree empréstimu-sira ne’e  iha efeitu ekonómiku  ba Timor-Leste iha ka la’e?, tanba la vale kuandu ita ko’alia kona-ba taxa jurus, maibé ita lekar osan arbiru de’it , maibé la konsege kapta osan tama fila-fali. Ita tenke kuidadu ho ida ne’e,” Ministru Rui Gomes afirma, ohin, iha debate OJE 2021 iha faze espesialidade iha sala plenáriu Parlamentu Nasionál,

Nia hatutan, relatóriu komisaun C ne’ebé trata asuntu finansa públiku  mós husu ba Governu atu halo avaliasaun ba efeitu ekonómiku hosi empréstimu-sira ne’ebé  banku Timor nia fó ba Timor-oan no setór privadu.

“Ita labele aumenta kapitalizasaun ba BNCTL sein hatene loloos nia efeitu ekonómiku hosi empréstimu-sira ne’ebé Banku sira fó ba Timor-oan no setór privadu sira,” nia akresenta.

BNCTL hanesan Banku Públiku ida iha Timor-Leste nian ne’ebé bele fó kréditu ka empréstimu barak liu, nune’e tinan ba daruak nian ne’ebé Governu deside atu kapitaliza BNCTL atu bele fó empréstimu barak liután.

Governante nota katak jerálmente empréstimu-sira banku fó ho bazeia ba depózitu ne’ebé iha, infelizmente durante tempu ne’e BNCTL seidauk konsege kapta depózitu, ne’ebé empréstimu-sira ne’e bazeia ba kapitalizasaun ne’ebé mai hosi parte Governu.

“Ita ko’alia oinsá banku ne’e bele apoia ekonomia tanba apoia ekonomia ne’e la’ós mai de’it hosi kréditu ka empréstimu, nesesáriu mós ita avalia katak empréstimu konsesionáriu-sira mós iha valór ekonómiku  tanba dala barak ita fasil tebes ba banku foti osan, maibé atu selu mós difikuldade boot, signifika katak aspetu jestaun ita tenke tau matan fila fali,” nia akresenta.

Membru Bankada PD, Mariano Assanami Sabino. Imajen Tatoli/ Egas Cristóvão

Iha fatin hanesan membru Bankada Partidu Demokrátiku (PD), Mariano “Assanami” Sabino, propoin atu halo alterasaun millaun $40 hosi kategoria transferénsia iha orsamentu Ministériu Obra Públika (MOP) hodi kapitaliza ba BNCTL fó kréditu ba Timor-oan.

“Ita foti tiha osan hodi tau iha ita nia banku rasik atu fasilita tTimor-oan halo negósiu no hakiak na’in-sira atu bele hakiak tanba fasil ba asesu kréditu. Ita tenke orienta ona kakutak sidadaun-sira negósiu la’ós hein apoia de’it,” Assanami hato’o hodi fundamenta nia proposta.

Maski, nune’e, Ministériu Obra Públiku, Salvadór Eugénio Soares dos Reis Pires hatene orsamentu ne’ebé aloka iha kategoria transferénsia públika ho millaun $194,490 atu reforsa transformasaun instituisaun rua hanesan EDTL, IP no Água de Timor,IP  ne’ebé sei hahú funsiona iha 2021.

“Ami nia orsamentu ne’ebé propoin iha OJE 2021 ne’e ho baze ba programa prioridade sira ne’ebé husu atu labele halo transferénsia fila-fali,” Ministru Salvadór afirma.

Proposta hosi Deputadu Mariano Assanami Sabino atu husu aumenta millaun $40 ba kapitaliza BNCTL ne’e  la pasa iha votasaun Parlamentu Nasional.

Jornalista   : Florencio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here