Imajen TATOLI/Osória Marques.

DILI, 10 dezembru 2020 (TATOLI)–Sekretária Estadu Igualdade no Inkluzaun (SEII), serbisu hamutuk ho Fundasaun Ázia liuhosi Programa Nabilan no Programa Monitorizasaun Sistema Judisiál (JSMP) realiza diskusaun aberta ida, involve jornalista nasionál sira, hodi ko’alia kona-ba mekanizmu hakerek notísia ho sensível ba jéneru.

“Ita halo diskusaun kona-ba oinsá hakerek notísia ne’ebé sensivél ba jéneru nune’e labele halo ema vítima sai vítima tan ba dala ida ho kazu ida de’it. Ita mós esforsu hamutuk hodi bele halo mudansa ba norma sosiál sira no valoriza igualidade iha setór hotu iha ámbitu 16 komemorasaun ba feto no labarik sira,” reprezentante Fundasaun Ázia, Maria Veronica da Costa hateten iha ámbitu diskusaun ne’ebé hala’o iha salaun Timor Post, Mandarin, Dili, kuarta ne’e.

Maria Veronica da Costa hateten, atu halo prevensaun ba violénsia hasoru feto no labarik feto, presiza serbisu hamutuk entre Governu, Sosiedade Sívil, mídia, nune’e bele iha mudansa.

“Bainhira ita atu halo prevensaun ba violénsia hasoru feto no labarik feto, presiza halo mudansa ba norma sosiál ne’ebé presija kontribuisaun ema hotu nian, hahú hosi individu, família, komuidade no sosiedade”, nia hateten.

Iha fatin hanesan, koordenadora JSMP, Flora Menezes husu parte hotu nia kontribuisaun atu kolabora no tau hanoin hamutuk hodi hamosu artigu balun ne’ebé temi kona-ba kazu insestu.

“Presiza ita hotu nia serbisu hamutuk atu dudu oinsá iha tinan oin, ita iha ona artigu ida kona-ba insestu ne’e rasik”, nia dehan.

Ho artigu ida ne’e, JSMP bele halo submisaun ida hodi lansa ba públiku no aprezenta ba Ministériu Justisa (MJ) inklui Parlamentu Nasionál (PN) atu bele haree no no fó solusaun.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here