Diretór Ezekutivu FONGTIL, Daniel Santos do Carmo. Imajen Tatoli/António Gonçalves

DILI, 09 dezembru 2020 (TATOLI)–Forum Organizasaun Naun Governamentál Timor-Leste (FONGTIL) kestiona makaas alokasaun millaun $14 ba Ró Haksolok tanba hatudu loloos katak Governu liuliu Autoridade Rejiaun Administrativa Espesiál Oé-Cusse Ambeno (RAEOA) halo prátika kontribui ba korrupsaun, tanba millaun $16 ne’ebé aloka tiha ona ba ró haksolok to’o agora laiha serteza atu mai.

Notísia Relevante: Bankada CNRT la konkorda Governu prevee millaun $16,9 ba Ró Haksolok

Diretór FONGTIL, Daniel Santos do Carmo, hateten tuir informasaun katak kompañia ne’ebé halo konstrusaun ró refere Banca Rota tiha ona, tanba ne’e FONGTIL haree katak ho pandemia COVID-19 ne’ebé afeta tebes ba situasaun sosiál ekonómia nune’e laiha prioridade atu rezolve Ró Haksolok.

“Adisionál osan $14 milliaun ne’e di’ak liu aloka fali ba setór agrikultura hodi hasa’e produsaun ai-han tanba OJE ba setór agrikultura soma hamutuk hosi alokasaun ba fundu infrastrutura, alokasaun ba munisípiu no RAEOA no Ministériu Agrikultura rasik hamutuk tokon $40,968 ho 2,16%. Ida-ne’e hatudu katak maske Governu ko’alia dehan setór agrikultura prioridade maibé laiha alokasaun pursentu boot ba setór refere,” Daniel Santos do Carmo, ba jornalista sira iha salaun FONFTIL Caicoli, Dili, kuarta ne’e.

Nia hatutan, ohin loron 09 dezembru 2020 komemora loron mundiál Anti Korrupsaun maibé FONGTIL nota katak korupsaun kontinua buras iha Timor-Leste.

“Ezemplu ida ne’ebé akontese iha ita-nia matan mak ró Haksolok ne’ebé aloka antes ne’e aloka tiha ona kuaze millaun $16 milliaun, maibé to’o agora laiha serteza no Governante sira kontinua tau osan $14 milliaun ba ida-ne’e,” nia subliña.

Tanba ne’e solusaun ne’ebé FONFTIL fó ba Parlamentu Nasionál (PN) no Governu mak, duke aumenta osan hodi rezolve ba Ró Haksolok ne’ebé laiha serteja, di’ak liu sosa ró foun ho tender ba kompañia sira iha Ázia, ezemplu Ró Nakroma ne’ebé ho de’it $3 millaun.

Ho razaun hirak ne’e FONGTIL hato’o rekomendasaun tolu ba Governu no Parlamentu Nasioná atu tetu didi’ak programa sira, nune’e labele fó todan ba OJE.

“Ami-nia rekomendasaun mak hanesan dahuluk (1) husu ba Parlamentu Nasionál hanesan orgaun ida ne’ebé reprezenta povu atu uza ita-boot sira-nia kompeténsia hodi ko’a sai tiha orsamentu adisionál $14 milliaun ba Ró Haksolok, aloka fali ba setór produtivu sira hanesan, agrikultura, turizmu, edukasuan, saúde, bee-moos, no saneamentu. Daruak, husu ba Governu atu halo prosesu sivíl hasoru kompañia ne’ebé halo konstrusaun ba Ró Haksolok atu selu indeminizasaun ba Estadu Timor-Leste. 3) FONGTIL dezafia Comição Anti Corupção no Ministériu Públiku atu ho seriedade loke investigasaun ba autór sira ne’ebé involve iha prosesu fó tenderizasaun ba Ró Haksolok,” nia hateten. 

Diretór FONGTIL afirma, relasiona ho proposta OJE 2021 ne’ebé daudaun ne’e Parlamentu Nasionál halo hela diskusaun, orsamentu refere tuir FONGTIL, konsidera boot iha Timor-Leste desde restaura ninia indepedénsia iha tinan 2002.

“Proposta OJE 2021 importante ba ita-nia ekonómia relasiona ba pandémia COVID-19, konsideradu ona sai pandémia tanba afeta ka da’et ba umanidade tomak mundiál nian, balu infetadu direta hosi virus ida-ne’e, barak mós sofre konsekuénsia sósiu ekonómiku hosi kazu ida-ne’e nia kalamidade,” nia dehan.

Nia dehan, Governu aprova tiha ona rekuperasaun ekonómika ba tinan 2021-2023 no atu implementa programa refere presiza rekursu finanseiru ne’ebé natón.

Timor-Leste nia ekonómia depedénsia totál ba osan mai hosi Fundu Minarai tanba relatóriu hosi Banku Centrál katak bainhira levantamentu kada tinan millaun $1.8 mak fundu ne’e sei ramata iha tinan 2032.

“Ho nune’e ita hotu preokupa oinsá mak OJE tenke ho karakter investimentu nune’e bele kontribui ba aumenta rendimentu petrolíferu hodi hamenus depedénsia ba fundu minarai nune’e bele garante sustentabilidade fundu refere ba jerasaun tuir mai,” nia dehan. 

Nia esplika, FONGTIL nafatin apresia esforsu Governu nian hodi aprezenta OJE 2021 ba Parlamentu Nasionál no hamosu pakote ekonómia oioin nu’udár resposta ba impaktu sósiu ekonómia, tanba Timor-Leste infrenta menus produsaun agríkula no FONGTIL rekoñese katak OJE 2021 kontribui tebes ba ekonómia.

Notísia Relevante: RAEOA propoin millaun $127 inklui millaun $14 finaliza Ró Haksolok

Jornalista: Osória Marques

Editór: Cancio Ximene

HAKEREK NO HATÁN

Please enter your comment!
Please enter your name here