Atu selebra Natal 2020 no tinan foun 2021, negosiante timoroan sira faan roupa iha Colmera, Dili. Imajen TATOLI/Osória Marques.

DILI, 09 dezembru 2020 (TATOLI)—Xefe Suku Colmera, Postu Administrativu Vera Crús Munisípiu Dili, Arménio da Costa, autoriza ona negosiante sira hodi faan roupa iha área Colmera.

Arménio da Costa hateten, negosiante sira-ne’e hetan autorizasaun hodi faan sira-nia sasán iha área ne’e tanba husu lisensa ba autoridade komunitária to’o autoridade munisípiu, nune’e sira faan gratuitatemente tanba lei la admite atu halo kobransa.

Atu selebra Natal 2020 no tinan foun 2021, negosiante timoroan sira faan roupa iha Colmera, Dili. Imajen TATOLI/Osória Marques.

“Negosiante sira mai husu ha’u no ha’u mak halo pedidu hodi husu autorizasaun ba autoridade Munisípiu, inklui Polísia eskuadra Vera Crús hodi halo seguransa ba sira. Tanba, tinan-tinan sira sempre mai faan. Ita labele bandu ka impede fatin ba ita-nia maluk timoroan ne’ebé hakarak buka moris uitoan molok Natál no tinan foun,” Xefe Suku Colmera, Arménio da Costa, informa ba Agência TATOLI iha Sede Suku Colmera, kuarta ne’e.

Líder komunitária ne’e haktuir, negosiante sira faan iha Colmera la selu taxa ba Estadu maibé husu de’it negosiante sira-nia kompreensaun no kontribuisaun tanba joven no pesoál seguransa sira mós presiza enerjia mak bele halo segunransa iha área ne’e.

“Ha’u la husu negosiante sira atu selu taxa. Maibé, ha’u husu de’it sira-nia kompreensaun, tanba faan ne’e presiza iha seguransa nune’e bele faan ho hakmatek no bele seguru di’ak liután iha tempu kalan,” nia dehan.

Xefe suku ne’e mós dehan, katak, parte munisípiu Dili mós aseita ona atu negosiante sira faan iha área Colmera ho gratuitamente.

“Adjuntu aseita atu faan, ha’u mós aseita bele faan iha ne’ebá. Maibé, buat ruma akontese iha ne’ebá, sé mak bele responsabiliza. Tanba ida-ne’e mak ha’u dehan faan gratuita, maibé husu kompriensaun negosiante sira nian, hodi kontrubui netik be ruma ka buat ruma ba seguransa no joven sira iha suku laran,” Xefe Suku ne’e haktuir.

Maski la hatene kona-ba negosiante sira harii barak hira iha área Colmera, maibé Xefe suku ne’e rekoñese katak negosiante sira hahú faan ona iha loron hitu (7) fulan dezembru.

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here