Plenária Parlamento Nasionál. Imajen TATOLI/Egas Cristovão.

DILI, 09 dezembru 2020 (TATOLI)—Deputadu Partidu Demokrátiku (PD) Mariano Assanami Sabino, propoin verba adisionál ho montante millaun $40 atu kapitaliza Banku Nasionál Komérsiu Timor-Leste (BNCTL-sigla portugés) maibé maioria deputadu sira vota kontra proposta refere.

Deputadu Assanami propoin proposta adisionál ho montante millaun $40 ne’e atu foti hosi kategoria transferénsia públika Ministériu Obra Públika (MOP) nian hodi halo kapitalizasaun ba BNCTL.

“Ho nune’e proposta númeru 43 la pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kuarta ne’e.

Assanami nia proposta ne’e atu foti millaun $40 hosi programa ho kódigu boa governasaun no jestaun institusionál kategoria transferénsia públika hosi Ministériu Obra Públika (MOP) nian hosi montante orsamentu $ 194,489,688.00 (millaun $190.490).

Deputadu Mariano Assanami Sabino fundamenta liuhosi justifikasaun sumária, katak bazea ba polítika Governu nian katak presiza fó kondisaun atu estimula vontade emprezáriu lokál sira atu-bele moris no bele kompete iha vida negósiu nian.

Maibé realidade hatudu katak emprezáriu timoroan sira sempre hasoru situasaun defísil tebes tanba laiha kondisaun no sira sempre halo deve iha li’ur ho jurus ne’ebé boot liu (10-20%) tanba ne’e sempre hamosu problema barak iha vida  emprezariál nian.

“Ho razaun ne’e mak ami propoin orsamentu millaun $40 hosi orsamentu transferénsia públika MOP nian atu-bele aumenta ba kapitalizasaun Banku Nasionál Komérsiu Timor-Leste (BNCTL) hodi bele fasilita ita-nia emprezáriu sira hodi bele hala’o sira vida emprezariál ho di’ak, dignu no kompetetivu,” Assanami argumenta liuhosi justifikasaun sumária.

Hatán ba poposta ne’e, Ministru Finansa Rui Gomes, esplika Governu prevee tiha ona millaun $40 ba BNCTL liuhosi dotasaun todo Governu, tanba ne’e la presiza aumenta tán.

“Ita hotu hatene banku públiku timor nian no ita kompara ho banku sira seluk ne’ebé iha timor, BNCTL fó empréstimu barak liu, apoia ekonomia la’ós mai de’it hosi kréditu ka empréstimu tanba ne’e ba 2021 governu aloka millaun $40,” Rui Gomes hateten.

Nia fundamenta, Ministériu Finansa no Banku Sentrál Timor-Leste (BCTL-sigla portugés) presiza halo estudu ba kréditu ne’ebé Banku Nasionál Komérsiu Timor-Leste implementa ne’e iha efeitu ekonómiku ka lae.

Prezidente Komisaun C (Finansa Públika), Deputada Maria Angélica Rangel, akresenta proposta millaun $40 ne’e laiha fatin.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here