Imajen/FMA.

DILI, 08 dezembru 2020 (TATOLI)–Prezidente Repúblika (PR), Francisco Guterres Lú Olo, rekoñese katak padre no madre barak mak hamriik kedas hasoru abuzu direitu umanu no barak mak identifika-aan nu’udár defensór ideál ukun rasik-aan liuhosi hahalok oioin, perante luta laibertasaun pátria Timor-Leste nian.

Notísia Relevante: Xefe Estadu Lú Olo iha esperansa sei vizita Estadu Vatikanu

Xefe estadu hato’o rekoñesimentu ne’e liohosi diskursu selebrasaun aniversáriu dioseze Dili (arkedioseze) ba dala ualu nulu (80), ne’ebé le’e hosi Xefe Kaza Sivíl Prezidénsia Repúblika, Francisco Maria de Vasconselhos, iha Igreja Katedral Nossa Senhora Imaculada da Conceição Katedral Villa Verde, Dili, tersa ne’e.

“Molok invazaun no okupasaun indonézia maioria Povu Timor-Leste hala’o  prátika animista. Fiar-na’in katóliku sei minoria hela bainhira militár indonéziu tama ita-nia Rain, iha 7 dezembru 1975. Ho hanoin katak, ho tauk mak  bele kontrola  lalais liu Povu Timor-Leste, militár indonéziu sira tama kedas ho prátika abuzu oioin, inklui halo persegisaun, tortura no oho ita-nia ema, liuliu sira ne’ebé defende ukun rasik-aan. Padre no madre barak mak hamriik kedas hasoru abuzu direitu umanu no barak mak identifika-aan nu’udár defensór ideál ukun rasik-aan liuhosi hahalok oioin. Ho sira-nia hahalok fó mahon, hahán no ai-moruk, eduka no proteje Povu, padre no madre sira hamorin babeibeik Igreja Katólika Timor-Leste nia naran, nu’udár instituisaun ida ne’ebé sempre hamriik iha Povu Timor-Leste nia sorin,” Xefe Estadu hato’o iha nia diskursu.

Aman nasaun ne’e hatutan, importante fó-hanoin ohin lala’ok boot ida-ne’ebé ankontese iha 13 Outubru 1981 hosi responsável másimu Igreja Katólika Timor-Leste.

“Durante selebrasaun Misa Kampál iha Lesidere, Díli, hosi Administradór Apostóliku Dom Martinho da Costa Lopes, ho espíritu Kristu-nian, ho barani no koerénsia, publikamente denunsia movimentu boot tebes ida, hosi militar indonéziu, hanaran ‘Operasaun Kikis’, ne’ebé iha objetivu atu hamoos tiha Rezisténsia Timorense,” PR Lú Olo konta.

Iha 6 fevereiru 1989, nia hatautn, Dom Carlos Filipe Ximenes Belo barani hakerek ba Sekretáriu-Jerál ONU no husu referendu ba Timor-Leste ho espíritu Rezisténsia Timorense nian: “Ami mate daudaun ona, nu’udár Povu no Nasaun”.

Apelu ida-ne’e, PR Lú Olo konsidera katak monu ba kristaun sira-nia laran  iha nasaun barak no nune’e ajuda Frente Esterna hala’o serbisu hodi hasa’e solidariedade internasionál ho Povu Timor-Leste.

Nia sita lala’ok boot seluk ida tan, hosi Igreja Katólika, akontese iha 12 outubru 1989, bainhira Amu Papa João Paulo II vizita Timor-Leste no deside fó-sai informasaun kona-ba situasaun iha rai-laran ba meiu komunikasaun sira iha mundu tomak nian. Hahalok ida-ne’e hatudu momoos ona katak Igreja Katólika lakohi Povu Timor-Leste halerik tan.

Alende ne’e, Xefe Estadu sita tan rekoñesimentu internasionál ba knaar Igreja Katólika nian iha Timor-Leste akontese iha 1996 bainhira Bispo Dom Carlos Filipe Ximenes Belo simu Prémiu Nobel da Paz hamutuk ho José Manuela Ramos-Horta.

“Tanba hahalok sira ne’e hotu, ne’ebé hatudu katak responsável katóliku sira identifika-aan ho Povu mak lori maioria animista hili Relijiaun Katólika  durante okupasaun indonézia,” PR Lú Olo subliña.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here