iklan

NASIONÁL, HEADLINE

MAPKOMS husu dirijente RTTL tenke rona malu

MAPKOMS husu dirijente RTTL tenke rona malu

Ministru Asuntu Parlamentár no Komunikasaun Sosiál, Francisco Jerónimo. Imajen/Antonio Goncalves.

DILI, 08 2020 (TATOLI)—Ministru Asuntu Parlamentar no Komunikasaun Sosiál (MAPKOMS), Francisco Jerónimo, husu ba drijente Rádiu Televizaun Timor-Leste (RTTL),E.P hosi prezidente to’o  hirak ne’ebé lidera dirasaun sira tenke rona  malu hodi buka solusaun ba problema, nune’e bele dezenvolve RTTL,E.P ba futuru sai di’ak liután.

“Ha’u husu ba ita hotu, soe tiha egoizmu, soe tiha vinga malu,  soe tiha hanoin negativu, saida mak ha’u iha. Rona malu hahú hosi Prezidente no Dirasaun hotu-hotu tenke rona malu hodi buka solusaun ba problema nune’e bele dezenvolve RTTL sai di’ak liután,” Ministru Asuntu Parlamentar no Komunikasaun Sosiál, Francisco Jerónimo, hateten iha ninia intervensaun bainhira MAPKOMS hala’o enkontru jerál ho dirijente no funsionáriu RTTL,E.P ne’ebé realiza iha salaun  Ministériu Transporte no Komunikasaun, Caicoli, Dili, tersa ne’e.

Francisco Jerónimo hatutan, laiha ema ida iha mundu ne’e matenek liu hodi deside mesa-mesak tanba ema ida-idak tenke rekoñese katak matenek ne’e ema ida-idak ninian, ne’ebé tenke iha servisu ekipa no tenke halo diálogu hodi solusiona ba problema sira ne’ebé akontese.

 “Laiha ema ida mak dehan ha’u matenek liu. Ha’u mak deside mesak no ha’u laiha  probelama  ho imi no imi mós laiha problema ho ha’u. Problema kiik nia mesak mak rezolve, ne’e labele hanesan ne’e. Tenke buka tuur hamutuk hodi rona malu, halo diálogu hodi buka solusaun ba problema sira ne’ebé ita hasoru. Tanba ida-ne’e mak xave ba dezenvolvimentu institusionál nian,” Francisco Jerónimo esplika.

Funsionáriu sira propoin substitui Prezidente RTTL

Entretantu, atu garantia jestaun no melloramentu servisu funsionáriu Rádiu Tevizaun Timor-Leste (RTTL),E.P sira-nian sai di’ak liu mak jornalista no funsionáriu sira propoin ba  Ministru Asuntu Parlamentár no Komunikasaun Sosiál (MAPKOMS) atu troka  Prezidente  RTTL,E.P atuál Francisco da Silva Garry.

“Ami jornalista no funsionáriu RTTL,E.P hakarak propoin ba Ministru Asuntu Parlamentár no Komunikasaun Sosiál atu troka Prezidente RTTL atuál Francisco Gary, atu nune’e bele hadi’a jestaun iha futuru,” Nuno Saldanha hato’o pedidu ne’e ba MAPKOMS.

Nuno Saldanha hateten, Governu liuhosi Ministériu Asuntu Parlamentár no Komunikasaun Sosiál presiza haree kestaun estrutura  RTTL,E.P nian, tanba konsidera durante ne’e hala’o  diskriminasun inklui la halo survei ba instituisaun.

Tanba, nia dehan,  durante ne’e nia parte nota katak, RTTL EP nia servisu durante ne’e la hatuur hanesan mídia nasionál ka mídia estatál ida iha Timor-Leste. Tnaba, nia dehan, hanesan motorista ida ne’ebé lori karrete karik tenke iha kapasidade di’ak.

“RTTL ne’e hanesan karreta ida karik, ema ida lori karreta ne’e tenke iha kapasidade di’ak no nune’e oinsa atu atinji RTTL sai hanesan mídia nasionál ne’ebé loloos. Ha’u hakarak hateten katak, kareta ne’ebé agora ami sa’e hamutuk ne’e, ami lakohi sa’e hamutuk ho kareta ne’e. Ha’u sujere motorista ida lori karreta ne’e tenke di’ak no iha kapasidade,” Nuno Saladanha hateten.

Aleinde ida-ne’e, jornalista Averio Ximenes iha ninia intervensaun deklara deklara katak nia parte akompaña hela, durante ne’e servisu na’in sira iha RTTL ne’e kahor ho partidu polítiku nian,  tanba ne’e nia husu ba MAPKOMS atu toma atensaun ba asuntu refere.

Hatán ba preokupasaun ne’e, Ministru Asuntu Parlamentar no Komuniasaun Sosiál (MAPKOMS),  Francisco Jerónimo, hateten ninia prezensa hamutuk ho funsionáriu no jornalista to’o dirijente RTTL atu tuur haree, hadi;a no mellora di’ak liután institusaun RTTL ne’e sai di’ak liután.

“Ha’u-nia prezensa ohin hamutuk ho ita-boot sira iha ne’e ho objetivu ida. Oinsá ita atu buka rezolve no fó solusaun ba kestaun sira-ne’ebé durante mosu iha RTTL, tanba durante ne’e ita la hatene katak buat hotu la’o diak maibé iha liur rma barak preokupa. Ita-nia deputadu sira mós preokupa. Tanba ida-ne’e, ha’u-nia prezensa ohin, hamutuk ita atu hadi’a no mellora hodi fó solusaun ba problema sira no preokupasaun sira ne’e,” Francisco Jerónimo hateten.

Jornalista: Natalino Costa

Editór: Cancio Ximenes

iklan
iklan

Leave a Reply

iklan
error: Content is protected !!