Konstrusaun “Memoriál 7 Dezembru 1975” iha Ponte Kais Dili. Imajen/Facebook: Tito Tivia Litia Abena.

DILI, 07 dezembru 2020 (TATOLI)–Prezidente Repúblika, Francisco Guterres Lú Olo, ohin, hateten povu Timor-Leste tenke hanoin nafatin mártir, eroi no eroina sira ne’ebé lakon vida ba invazaun Indonézia iha 07 dezembru 1975.

Notisia Relevante: CNC sei konstrui “Monumentu 7 Dezembru 1975” provizóriu iha Ponte Kais Dili

“Ohin ita halibur, iha fatin moruk ida ne’e, atu hanoin ita-nia mártir sira, ita-nia eroina no eroi sira no mós belun boot ida, ne’ebé ita lakon husi loron 7 to’o 10 dezembru 1975,” Prezidente Repúblika Francisco Guterres Lú Olo, hato’o mensajen ne’e iha serimónia inaugurasaun “Memoriál 7 dezembru 1975” iha ponte kais, Dili, segunda ne’e,

PR Lú Olo hateten, Centro Nacional Chega (CNC), ne’ebé tutela husi Gabinete Primeiru-Ministru, liuhusi esforsu durante tinan tolu nia laran, konsege duni hatuur iha fatin moruk ida-ne’e, memoriál ida hodi rejista no valoriza mártir, eroína no eroi sira-nia naran no nune’e jerasaun hotu-hotu bele hatene katak prosesu ukun rasik-aan ne’e la’ós fásil.

Ho memoriál ida-ne’e, Xefe Estadu relata katak Estadu Timor-Leste dignifika sira no bele fó haksolok uitoan ba família sira-ne’ebé lakon ema hosi uma-laran liuliu ba oan-kiak sira, ne’ebé ohin hamriik iha fatin ne’e.

Xefe Estadu haktuir, Estadu ninia rekoñesimentu la halai de’it ba sira-ne’ebé fakar raan maibé hakoak movimentu libertasaun nasional no hato’o mós ba maluk sira seluk ne’ebé hetan tiru no mate iha loron haat (07-10 dezembru 1974) nia laran hafoin loron invazaun Indonézia.

“Iha memorial ida-ne’e Estadu Timor-Leste dignifika aaswa’in membru Comité Central FRETILIN (CCF) na’in rua, ida mak ita-nia poeta boot tebes ida, saudozu Francisco Borja da Costa, ne’ebé sai autor ba poezia revolusionáriu lubuk ida, ho lian fuan furak habrani Povu tomak hodi hamriik no ukun rasik ita-nia Rain. Ninia poezia balun “Eh Foho Ramelau”, “Kadadalak Suli Mutuk” no Hino Nacional “Pátria, Pátria”, ne’ebé nakfila ba múzika ne’ebé ita hotu kanta hodi hamanas espíritu luta nian no hametin unidade nasional, tinan ba tinan, iha rai-laran no rai-li’ur,” nia dehan.

Francisco Guterres Lú Olo afirma, Poeta ne’e husik hela oan mane ida ho naran Nur Tiago Borja da Costa, ne’ebé Estadu haksolok ohin ho serimónia ida-ne’e.

“Ha’u sente laran-ksolok tebes tanba beioan ida husi poeta Francisco Borja da Costa tuir hela ninia ain-fatin iha área poezia,” Lú Olo hateten.

Xefe Estadu ne’e haktuir, membru CCF seluk mak saudoza Rosa Muki Bonaparte ne’ebé iha 1975, nia husik ninia estudu iha Portugal no fila mai Timor-Leste ho esperiénsia nu’udar membru CCF iha Portugal. Nia fila ho raan manas atu haforsa knaar FRETILIN nian no ho hakarak atu luta ba igualdade direitusno oportunidade entre mane no feto.

“Tanba ninia dedikasaun tomak no kapasidade organizasaun no lideransa, CCF hili kedas Muki ba kaer kargu nu’udar Sekretária-Jerál Organizasaun Popular da Mulher Timor, OPMT. Molok nia mate, OPMT konsege hametin-aan tiha ona nu’udar organizasaun masas no ida-ne’e mak legadu boot liuhosi saudoza Rosa Muki Bonaparte,” nia hateten.

Iha memorial ida-ne’e, PR Lú Olo hateten, OPMT ne’ebé nu’udar membru União Nacional dos Estudantes Timores, UNETIM no mós Organização Popular da Juventude Timor (OPJT). Saudoza Epifánia Maria da Silva, Bimba aliás Namuk, ne’ebé sai mós protagonista boot ida hamutuk ho saudoza Rosa Muki Bonaparte no feto maluk sira seluk hodi hala’o duni OPMT, harii iha 28 agostu 1975, husi FRETILIN nu’udar organizasaun feto sira-nian, atu involve-aan iha prosesu luta ba independénsia nasionál no mós atu kontribui ba haburas sosiedade ida ho igualdade direitu no oportunidade entre mane no feto.

“Ita haree mós saudoza Isabel Barreto nia naran, espoza hosi saudozu Prezidente Repúblika Nicolau dos Reis Lobato, ne’ebé hetan mós tiru no mate iha Ponte Kais no husik hela oan mane kiik la too tinan rua, José Lobato, ne’ebé ohin simu ksolok boot hosi Estadu Timor-Leste. Nia hetan tiru no mate mós iha fatin ida-ne’e. Ita-nia belun boot ida, jornalista australianu, Roger East, ne’ebé biar iha oportunidade atu sai hosi Timor-Leste, deside hela tanba hakarak lori nafatin ninia misaun atu harii ajénsia notisioza Timor-Leste nian (ETNA=East Timor News Agency),” PR Francisco Guterres dehan.

Hosi loron 7 to’o 10 dezembru 1975 no loron tuir tan, Timor-Leste barak tebes lakon sira-nia vida biar la asosia ho movimentu libertasaun nasionál, inklui timoroan barak ho raan timor kahor ho raan xina. Ba sira-nia memória hakruuk no valoriza mós ba sira.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here