Konstrusaun “Memoriál 7 Dezembru 1974” iha Ponte Kais Dili. Imajen TATOLI/Osória Marques.

DILI, 07 dezembru 2020 (TATOLI)–Diretór Ezekutivu Centro Nacional Chega (CNC), Hugo Maria Fernandes, hateten Memoriál 7 Dezembru 1975 ne’e sai hanesan prezente natal ba tinan ne’e nian hodi ema hotu-hotu bele banati no la’o tuir.

Notisia Relevante: Memória pasada sai dalan di’ak hodi refleta loron nasionál memória nian

“Ba ami Centro Nacional Chega, Memoriál 7 Dezembru 1975 ne’e, ami oferese nu’udar prezente natal nian ida ne’ebé ho forma atu ita hotu hakat ba oin di’ak liután. Iha esforsu nasionál hodi hatudu katak dame iha Timor-Leste,” Diretór Ezekutivu CNC, Hugo Maria Fernandes hateten ba jornalista sira iha ámbitu selebrasaun Memoria 7 dezembru iha ponte kais, Dili, segunda ne’e. 

Hugo Fernandes hateten, CNC hakarak agradese ba Ministru Administrasaun Estatál (MAE), Miguel Perreira de Carvalho, ne’ebé mak loron hirak liubá konfirma hodi prepara rezolusaun Governu nian no hetan aprovasaun hosi Konsellu Ministru kona-ba Memoriál 7 Dezembru 1975 ne’e.

Nia dehan, Memoriál 7 Dezembru 1975 ne’e konstrui no inagura ohin, tanba hetan apoiu no tulun hosi Ministériu Obras Públika (MOP) ho Ajénsia Dezenvolvimentu Nasionál (ADN) hodi aprova ona dezenu tékniku no autorizasaun ba harii Memoriál 7 Dezembru 1975 ne’e.

Entretantu, nia dehan CNC hamutuk ho Ministériu Komérsiu Turizmu no indústria (MTCI) no Autoridade Portuáriu Timor-Leste (APORTIL) atu asegura Memoriál 7 Dezembru ne’e.

“Ita sei koordena ho MTCI ho APORTIL atu bele asegura asesu vizitante sira ba Memoriál 7 dezembru ne’e”, nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here