Xefe Estadu Maiór Jenerál F-FDTL, Majór Jenerál, Lere Anan Timur hamutuk ho Bispu Dioseze Baucau, Don Basílio do Nascimento, Padre Kapelaun Rui Gomes, SDB, no komandante-sira partisipa misa inaugurasaun ba Kapela no Estátua São Miguel Arcanjo iha Komandu Terrestre Primeiru Batallaun iha Lanud, Baucau. Imajen/F-FDTL

DILI, 07 dezembru 2020 (TATOLI)- Bispu Dioseze Baucau, Don Basílio do Nascimento, husu ba membru FALINTIL-Forsa Defeza Timor-Leste (F-FDTL) hotu atu asume nafatin papél forsa armada nian tuir Konstituisaun haruka no tuir estatutu forsa armada nian.

Don Basílio hateten, importante mós ba forsa F-FDTL ne’ebé hanesan sarani atu serbí povu ida-ne’e ho laran moos no hanoin di’ak.

Xefe Estadu Maiór Jenerál F-FDTL, Majór Jenerál, Lere Anan Timur hamutuk ho Bispu Dioseze Baucau, Don Basílio do Nascimento, Padre Kapelaun Rui Gomes, SDB, no komandante-sira partisipa misa inaugurasaun ba Kapela no Estátua São Miguel Arcanjo iha Komandu Terrestre Primeiru Batallaun iha Lanud, Baucau. Imajen/F-FDTL

“Ha’u  husu ba ita boot-sira atu serbí ita boot sira-nia nasaun, no ita boot sira-nia patria prontu ba beibeik tuir ita boot sira-nia lema hakerek iha livru. Maibé  keta haluha katak, ita boot sira sarani no sai mós ema ne’ebé hanorin ema seluk hodi ita boot sira-nia knaar serbí ema hanesan mensajeiru Anju São Gabriel ne’ebé lori liafuan di’ak, no hanoin di’ak ba ema-sira ne’ebé ita boot sira serbí,”  Bispu Basílio hateten iha nia omilia bainhira prezide selebrasaun misa agradesimentu hodi komemora aniversáriu Komponente Terrestre Primeiru Batallaun ba dala-XIX iha Lanud-Baucau, sábadu (05/12).

Liuhosi nota komunikadu imprensa ne’ebé Agência Tatoli simu hosi F-FDTL, ohin, Don Basílio lia tun hodi husu ba membru militár sira hotu atu serbí nasaun no patria hodi defende estadu no povu iha kualkér ameasa ne’ebé fó perigu no lori risku ba vida nasaun.

Don Basílio husu ba membru sira hala’o servisu ho profisionál no disiplina hodi serbí estadu ho profisionál.

Tuir Don Basílio, aniversáriu Komponente Terrestre F-FDTL ba dala-XIX la’ós buat fasil, maibé F-FDTL harii ho ema barak nia terus no mate maka ohin loron Instituisaun F-FDTL eziste atu sai forsa ida profisionál ba futuru bele hola parte iha kualkér misaun dame Organizasaun Nasoins Unidade (ONU).

Iha fatin hanesan, Xefe Estadu Maiór Jenerál F-FDTL, Majór Jenerál, Lere Anan Timur hato’o parabéns ba Komandu Komponente Terrestre hodi kontinua hala’o nafatin sira nia servisu.

Lere husu atu membru F-FDTL  kontinua servisu, tanba Estadu no povu presiza tebes atu nasaun no povu moris hakmatek iha estabilidade seguransa hodi fó kontribuisaun ba dezenvolvimentu Timor-Leste.

“Misaun ida ne’e ezije imi nia disiplina no lealdade, ita ne’e maka importante tebes atu serbí Estadu no ita lakohi hafo’er Estadu no lakohi hafo’er instituisaun nia naran,” Lere apela.

Lere husu ba komandante sira hotu-hotu atu hala’o nafatin servisu no kontrola membru tomak kontinua presta servisu ho di’ak, no Estadu iha devér atu tau matan ba ben-star membru sira-nian no buka rezolve problema ne’ebé komandu F-FDTL enfrenta.

Nia husu atu forsa F-FDTL kontinua hala’o nafatin sira-nia knaar hakbesik ba povu hodi lori hikas dame no moris di’ak ba povu hodi tau konfiansa ba Instituisaun F-FDTL nu’udar liman kro’at povu no Estadu nian.

Nia hatutan, ohin loron Komponente Terrestre la’ós hala’o de’it misaun iha Baucau, maibé sira hahú envolve  hodi apoiu servisu Unidade Patrullamentu  Fronteira (UPF) garante seguransa iha Postu Fronteira Terrestre, Covalima, Bobonaro, Balibo, Batugade, Ataúro no Oe-Cusse.

Iha selebrasaun ne’e, Bispu Basílio ne’ebé akompaña mós hosi Padre Kapelaun Rui Gomes, SDB, no Majór Jenerál Lere Anan Timor,  halo inaugurasaun mós ba Kapela no Estátua São Miguel Arcanjo .

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here