Ministru asuntu Parlamentár no Komunikasaun Sosiál, Francisco Jerónimo no reprezetante Prezidente RAEOA, Leonia Monteiro, halo abertura ba jogu amigável futsal entre ekipa feminina RAEOA no Ministériu Administrasaun Estatál (MAE) iha kampu futsal, Bebora, Dili, domingu (06/12). Imajen Tatoli/Xisto Freitas

DILI, 06 dezembru 2020 (TATOLI)–Rejiaun Administrativa Espesiál Oé-Cusse Ambeno (RAEOA) realiza jogu amigável futeból salaun (futsal) iha kapitál Dili nu’udar kampaña kontra violénsia bazeia ba jéneru ne’ebé mak hala’o iha tinan-tinan (25 novembru-10 dezembru) iha mundu tomak.

Prezidente RAEOA, Arsénio Paixão Bano, hateten katak jogu amigável entre RAEOA ho instituisaun públika sira iha kapitál Dili, tanba pertense ba programa Governu nian.

“Ami RAEOA lori ekipa feto mai iha kapitál Dili hodi halo jogu amigável ho maluk feto sira seluk iha instituisaun públika iha Dili, la’ós atu buka manán, maibé hasa’e konxiénsia ema hotu nian, atu proteje feto no labarik iha Timor-Leste,” nia dehan ba jornalista sira, iha kampu futsal, Bebora, Dili, domingu ne’e.

Nia hatutan, horisehik (05/12) mós ekipa feto RAEOA hasoru ekipa feto husi CNE no ohin hasoru fali MAE no MAPKOMS.

Notísia relevante: Jogu Amigável, ekipa RAEOA dere ekipa MAPKOMS 5-4

Iha biban hanesan, Ministru Asuntu Parlamentár no Komunikasaun Sosiál, Francisco Jerónimo, haklaken ekipa RAEOA hakarak joga amigável ho instituisaun públika hanesan CNE, MAE no MAPKOMS ho objetivu ida aleinde kampaña kontra violénsia ba jéneru, atu hametin mós amizade entre jogadora sira hosi RAEOA no iha Kapitál Dili.

Selebrasaun loron 16 kona-ba hapara violénsia hasoru feto no labarik (25 novembru-10dezembru) iha tinan ne’e ho tema “Ita Hotu-Hotu Dehan Lae ba Violénsia Hasoru Feto no Labarik”.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here