Jogadór AD SLB Laulara selebra sira-nia vitória banhira hatama golu ba guarda rede DIT FC iha jogu semi finál Tasa 12 Novembru 2020 iha Estádio Municipal de Díli, domingu (6/12). Imajen Tatoli/António Gonçalves

DILI, 06 dezembru 2020 (TATOLI)–Ekipa estimadu Makikit Laulara alias AD SLB sei ‘funu’ hikas hasoru Lalenok United FC iha finál Tasa 12 Novembru époka 2020.

Istória hakerek ona iha ekipa rua nia jornada jogu. Tinan kotuk, ekipa rua hasoru-malu iha finál Tasa 12 Novembru maibé SLB la konsege silu monu Lalenok no Lalenok hetan direitu absolutamente sai hanesan kampiaun iha Estádio Municipal de Díli.

Jogadór AD SLB Laulara FC (kamizola mutin-mean) hadau malu bola ho jogadór DIT FC iha jogu semi finál Tasa 12 Novembru 2020 iha Estádio Municipal de Díli, domingu (6/12). Imajen Tatoli/António Gonçalves

Laos ne’e de’it. SLB mós obrigadu tenke hakruuk ba Lalenok tinan kotuk iha jogu Supertasa ne’ebé hala’o iha Estádiu Café Gleno. SLB mós rende hasoru Lalenok iha fulan hirak ba kotuk iha finál Kopa Federasaun Futeból Timor-Leste (FFTL) iha Estádiu Café Gleno.

Notísia relevante: Lalenok ultrapasa ba finál Tasa 12 Novembru

Furak liután, ekipa rua ne’e hasoru-malu dala ida tan iha finál Tasa 12 Novembru 2020. Sé loos mak atu sai kampiaun, sei segredu tempu nian!

SLB hakur ba finál Tasa 12 Novembru tinan ne’e hafoin halakon nia adversáriu DIT FC ho rezultadu golu 3-1, iha Estádio Municipal de Díli, ohin lorokraik.

Jogadór DIT FC (kamizola azúl) hadau malu bola ho jogadór AD SLB Laulara FC iha jogu semi finál Tasa 12 Novembru 2020 iha Estádio Municipal de Díli, domingu (6/12). Imajen Tatoli/António Gonçalves

Golu vitoria SLB kontribui hosi jogadór Zenivio Mota (17) iha minutu ’28, Mouzinho de Lima (10) ’72 no João Pedro (10) ’81. Enkuantu, golu DIT hatama hosi Venseslau Fátima (22) iha minutu ’34.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here