Sentru Formasaun Nicolau Lobato nia área ortikultura no florikultura. Imajen/Egas Cristovão.

LIQUIÇA, 05 dezembru 2020 (TATOLI)—Na’in ba Sentru Formasaun Nicolau Lobato, Luis Lobato, informa durante ezisténsia Sentru Formsaun  Nicolau Lobato hahú hosi 2013 iha Leorema ne’e konsege forma ona joven hamutuk na’in-200 resin  iha área oioin.

Notisia Relevante: Leorema-oan harii kooperativa Credito União de Estrela

“Uluk hahú fofoun ne’e ho Sentru Formasaun Nicolau Lobato ne’e, konsege forma duni joventude hamutuk 200-resin, liuhosi apoiu Sekretária Estadu Formasaun Profisionál Empregu (SEFOPE) nian, no joven sira-ne’e mai hosi munisípiu sanulu (10) tuir formasaun fulan tolu kona-ba dixipliña, komunikasaun, halo nusa maka bele uza osan, rai osan no halo nusa maka bele kuda aifunan, kuda modo, tratamentu ne’ebé hotu-hotu ne’ebé mak importante ba kriasaun fahi no manu,” Luis Lobato informa ba Agência Tatoli iha Leorema, sábadu ne’e.

Nia dehan, iha Sentru Formasaun Nicolau Lobato ne’e fó formasaun kona-ba oinsá hakiak animál sira hanesan hanesan hakiak manu-rade, fahi no animal sira seluk tan.

“Ha’u mós iha kriasaun iha ne’e manu-rade, fahi. Formasaun ne’e ikus mai ha’u la kontinua  tanba  tinan tolu nia laran ita moris iha situsaun ida krize finansiamentu, buat sira-ne’e hotu. Maibé buat sira-ne’e hotu ha’u hanoin iha 2021, ha’u hanoin atu hahú hanoin fila-fali fó formasaun ba joventude sira,” Luis Lobato hateten.

Maske mune’e, nia dehan, nia parte hakarak husu Governu tenke fó apoiu ba ema ne’ebé mak hetan formasaun ne’e para bele halo servisu. Tuir nia, Sentru Formasaun Nicolau Lobato Lobato fou-foun fó formasaun ba joven na’in-54 hosi munisípiu 10 ba grupu 10 atu halo ivestimentu.

“Ha’u haruka sira ba halo levanteamentu ba munisipiu sira, sira identifika hektares 49 de terrenu atu halo investimentu aifunan no joven sira-ne’e halo proposta ha’u hato’o ba Ministériu Agrikultura Peskas (MAP), hodi apoiu sira proposta  ne’e rasik  $140.000.000, maibé momentu ne’e la apoiu,” Eis Vise-Ministru Saúde ne’e hateten.

Nia dehan, estudante sira ne’ebé eskola iha agrikultura iha ne’e sira mós mai halo pratika iha ne’e, no estudante UNTL sira mós tuir formasaun iha ne’e, hosi madre sira mós hakarak haruka mai, formasaun iha ne’e gratuitamente la kobre buat ida.

Tuir nia, aifunan ne’ebé  kuda iha sentru formasaun dadaun ne’e hamutuk 41 espesié no hetan lisensa hosi  karantina  no agrikultura. Aifunan sira-ne’e hanesan  Rozas, Krizanto, Strawberry,  Pucuk Merah no agora dadauk balun kuda iha Dili,  iha estrada Delta oin ne’e aifunan sira-ne’e ba hosi Sentru Formasaun Nicolau Lobato.

“Ha’u la tau ba loja tanba komu produsaun ne’e sei ki’ik no aifunan iha terenu ne’e 11 hektares. Maibé produsaun ne’e la to’o 11 hektares,  barak liu kuda ai-oan, kuda haas, kuda sabaraka,” Luis Lobato hateten.

Nia haktyuir rendimentu ba ai-fuanan ne’e rasik depende ba situsaun hotu, dala ruma aifunan barak loos ema la presiza, dala ruma hanesan finadu ema barak demais aifunan la to’o entaun depende ba situsaun.

“Maibé rendimentu diáriamente bele hetan $300 minimu no bele to’o $3000. No, dadaun ne’e pedidu ne’e barak liu aifunan de’it,” nia dehan.

Nia hatutan, sentru formasaun ne’e mós hakiak manu-rade sira, manu-rade sira ne’e faan $10, dala ruma ema hameno mai loron ida to’o 100 to’o 200. Hosi rendeimentu ne’e mak nia utiliza selu fali ba ninia funsionáriu sira.

Luis Lobato hateten, Sentru Formasaun Nicolau Lobato  kuda mós modo maibé modo ne’ebé kuda ne’e la sustentavél tanba  dala ruma nia lori modo karada ida ba Dili hatama iha loja no hein loja faan tiha  mak ba foti osan

“Dala ruma ita hatama $100  nian, ita ba foti de’it $50 no $50 ne’e dodook tiha. Entaun, ha’u modifika ida-ne’e, modo kuda para han de’it. Maibé  buat ne’ebé fundamentál liu iha ne’e mak mak aifunan ho krisaun manu-rade,” nia dehan.

Entertantu Sentru formasaun Niclau Lobato ne’e harii hosi Luis Lobato iha 2013 no daudaun ne’e  kompleta ona  tinan hitu (7) ho investimentu rasik ho totál valór investimentu bele to’o $300.000.000 hodi utiliza ba prepaarasaun fatin, uma sira  ba  fahi no manu.

 Jornalista: Natalino Costa

Editór: Cancio Ximenes

HAKEREK NO HATÁN

Please enter your comment!
Please enter your name here