Sekretáriu Estadu Kooperativa, Elizário Ferreira. Imajen Tatoli/António Gonçalves

LIQUIÇÁ, 05 dezembru 2020 (TATOLI)–Sekretáriu Estadu Kooperativa (SEKOOP),  Elizário Ferreira, hateten parte kooperativa rejista ona negosiante ambulante na’in-100 atubele asesu ba kréditu osan nune’e sira bele sobrevive iha kapitál Dili.

“Ita rejistu ona negosiante ambulante hamutuk na’in-100 no sira-ne’e rejistadu ona iha baze dadus Sekretaria Estadu Kooperativa, nune’e sira bele mantein negosiante ambulante iha Dili laran atubele hasa’e sira-nia ekonómia,” nia dehan  ba Agência Tatoli iha Leorema, Munisípiu Liquiçá, sábadu ne’e.

Ezekutivu ne’e haktuir katak Governu liuhusi SEKOOP foin daudaun fahe karosa ba negosiante ambulante na’in-25 ho objetivu oinsá sira bele halo negosiu ho dignu.

Elizário Feireira husu ba negosiante ambulante sira ne’ebé hetan ona karosa atu kuidadu didi’ak nune’e bele ajuda negósiu.

Nia hatutan, parte SEKOOP mós rejista ona  grupu kooperativa ne’ebé mak kriativu ne’ebé durante ne’e halo kooperativa iha setór produtivu sira hanesan hakiak ikan, kuda modo no seluk tan.

“Ami identifika no rejista ona grupu sira-ne’e. To’o horisehik (04/12), iha  grupu kooperativa kriativu hamutuk 37 mak rejistadu,” governante ne’e haklaken.

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here