Imajen/Media PN.

DILI, 05 dezembru 2020 (TATOLI)—Deputadu parlamentár sira kompostu Frenti-Mudança (FM), Partidu Demokrátiku (PD) no Partidu Unidade Dezenvolvimentu Demokrátiku (PUDD), propoin atu ko’a osan rihun $3 ba Sekretária Estadu Formasaun Profisionál no Empregu (SEFOPE).

Maski nune’e, proponente sira retira tanba Sekretariu Estadu Juventude no Desportu (SEJD), Abrão Saldanha la konkorda.

Proponente ba proposta ne’e mak deputada Isabel Ximenes, Elvina Sousa no deputadu António de Sá Benevides. Proponente sira halo justifikasaun sumária, propoin atu redusaun ba montante rihun $3,069 hosi montante rihun $190,000 iha kategoria despeza bens no servisu ba Diresaun Nasionál Asosiativizmu Juventude ba programa promosaun juvenil no desportiva iha Sekretária Estadu Juventude no Desportu (SEJD) hodi aloka fali ba Sekretaria Estadu Formasaun Profisionál no Empregu (SEFOPE).

Proposta hosi proponente sira kona-ba programa definisaun estratéjiku formasaun profisionál no reforsa kompromisu ho formasaun profisionál iha ámbitu mão de obra kualifikada ho asesu  ba empregu no dezenvolvimentu ekonómiku ne’ebé sei implementa hosi Diresaun Nasionál Polítika Formasaun Profísionál tanba iha instituisaun rua ne’e sei implementa programa no atividade ne’ebé kuaze hanesan (sobre pozisaun) ho objetivu hanesan atu halo formasaun no kapasitasaun tanba ne’e sujere atu SEFOPE mak implementa programa refere.

Deputadu Isabel Ximenes fundamenta proposta ne’e katak formasaun profisionál ligadu liubá SEFOPE tanba orsamentu kada programa ne’e ninia difikuldade ne’e mak Governu enfrenta sobre pozisaun programa.

“Ida-ne’e maka ami buka identifika no propoin ba Governu hadi’a prevee tuir nia fatin nune’e ita prevene gastu ne’ebé la tuir nesesidade. Nesesidade ita atu hola ekipamentu para apoiu formasaun ita apoia mak SEFOPE nune’e labele hadau-malu programa formasaun ne’e entaun SEFOPE mak merese lidera formasaun ne’e,” deputada Isabel Ximenes, argumenta liuhosi debate espesialidade loron daruak, iha plenária, Parlamentu Nasionál, sábadu ne’e.

Hatán ba proposta ne’e, Sekretáriu Estadu Juventude no Desportu (SEJD), Abrão Saldanha, esklarese proposta ne’ebé proponente sira propoin ne’e la’ós ba formasaun.

“La konkorda tanba osan ida-ne’e atu prevee ba viajen lokál, se ko’a (korta) agora entaun laiha supervizaun no laiha akompaña ba kraik,” governante ne’e esplika.

Governante ne’e fundamenta, kategoria bens no servisu prevee daudaun ne’e ho montante rihun $190 ne’e bá liu programa juvenil no desportiva tanba orsamentu ba programa ida-ne’e hamutuk millaun $6-resin.

Nia dehan, orsamentu atu apoia programa mak rihun $3 hosi rihun $190 ne’e inklui viajen lokál atu akompaña sentru organizasaun juventude ne’ebé implementa programa juvenil no desportiva.

“Até osan ne’e ami halo ezersísiu hodi implementa programa sira-ne’e tanba programa SEJD nian iha 2021 barak liu sei implementa iha kraik, sei kobre 226 suku iha atividade juvenil nian sei kobre postu administrativu 65 atu implementa atividade desportu juvenil,” nia esklarese.

Governante ne’e fó razaun katak, kona-ba sobre pozisaun ba programa esplika tiha ona ba Komisaun G ne’ebé trata asuntu Edukasaun, Juventude, Kultura no Sidadania durante audiénsia públika.

Abrão Saldanha subliña, iha formasaun ne’e SEJD atua iha soft skill (formasaun sívika), Life Skills-Based Education (LSBE) ka edukasaun baze kompeténsia ba vida, agora atu aumenta tan formasaun kampaña ba prevensaun isin-rua sedu.

“Formasaun modelu hanesan ne’e sei halo iha kursu sira-ne’ebé mak akontese ona tanba sentru juventude sira hamutuk 15 ne’ebé mak iha munisípiu sira halibur malu tanba sira iha nesesidade kursu ba inglés, kursu ba komputadór, ida-ne’e mak sira halo iha sira-nia sentru. SEJD fó apoia ba sentru sira dezenvolve sira-nia programa,” nia katak.

Purtantu, Deputadu bankada FRETILIN, Joaquim dos Santos “Boraluli” depende orsamentu ne’e tenke mantein iha SEJD tanba promove atividade juvenil no formasaun profísionál lahanesan.

“Buat rua ne’e la hanesan tanba ne’e fundamentu hosi proposta hosi proponente sira bele loos maibé se proposta ne’e pasa sei prejudika atividade SEJD nian. Formasaun juventude ne’e orienta liu atu eleva karáter pesoál no atu hamoris kapasidade téknika orienta ba merkadu. Ha’u hanoin proponente sira konkorda karik bele retira de’it,” nia fó hanoin.

Nune’e mós, Prezidente Komisaun F (Edukasaun, Juventude, Kultura no Sidadania), António Verdiál de Sousa konkorda ho esklaresimentu SEJD nian.

“Osan tau nafatin iha-ne’ebá (SEJD), sira mak halo programa no implementa, tanba ne’e ha’u husu proponente sira retira tiha,” deputadu bankada KHUNTO ne’e hateten.

Hatán ba kestaun sira-ne’e, Deputada Isabel Ximenes ne’ebé elabora proposta ne’e, hateten la’ós kestaun retira ka la retira maibé livru 2 (planu asaun anuál) rasik mak mensiona atividade maibé kestaun mak orsamentu mai kada programa.

“Konfirma fali iha livru 4AB (rúbrika orsamentál) ne’ebé mak viajen lokál ba diresaun servisu SEJD nian mós laiha ho montante rihun $3 ne’e. Se iha livru ne’e dehan iha viajen lokál ami laiha problema. Kestaun mak orsamentu kada programa entaun tenke programa ne’e la’o orsamentu, labele iha livru ko’alia ida, sekretáriu estadu mai esplika fali programa seluk ida. Ami bele retira maibe ami sei halo fiskalizasaun implmentasaun ba atividade ne’e,” deputada Isabel hateten hodi deside retira proposta ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here