Prezidente CDN-CNRT,, Dionísio da Costa Babo Soares. Imajen/António Gonçalves.

DILI, 05 dezembru 2020 (TATOLI)—Prezidente Konsellu Diretiva Nasionál (CDN-sigla portugés) hosi partidu Congresso Nacional de Reconstrução de Timorense (CNRT), Dionísio Babo Soares, husu polítiku sira atu valoriza traballadór timor-oan sira iha estranjeiru ne’ebé kontribui redús dezempregu rai-laran.

Prezidente CDN-CNRT, Dionísio Babo Soares, hateten timor-oan sira iha Reinu Unídu, Korea-Súl, Austrália no rai seluk, ne’ebé serbisu iha indústria oin-oin hanesan fábrika, área turizmu, otelária, bakery, serbisu públiku no indústria prosesamentu ba hahán, ho seluk tan kontribui mós ba prosesu dezenvolvimentu Timor-Leste.

Tanba, tuir nia, timor-oan sira-ne’ebé serbisu iha nasaun hirak’ne’e kontribui ba ekonomia família nian liuhosi selu oan sira ba eskola no sustenta mós nesesidade bázika sira seluk.

“CNRT lamenta tebes ho atitude ne’ebé la valoriza no hatún ita-nia maluk timor-oan sira-ne’ebé serbisu iha rai-li’ur ho liafuan ne’ebé la respeita maluk timor-oan sira-ne’e. CNRT kondena polítiku sira-ne’ebé hatún maluk timor-oan sira-ne’ebé serbisu iha rai-li’ur ho liafuan hanesan “fokit manu-fulun,” Eis Ministru Negósiu Estranjeiru no Kooperasaun ne’e informa ba Ajénsia TATOLI iha Dili, sábadu ne’e.

Prezidente CDN-CNRT ne’e haktuir, timor-oan ne’ebé serbisu iha rai-li’ur ne’e kada tinan sira haruka osan (remittances) entre millaun $30 to’o millaun $50 (la’ós númeru loloos) bele boot liu fali ida-ne’e mai Timor-Leste ne’ebé kontribui ba Produtu Internu Bruto (PIB) maski osan sira-ne’e diretamente ba individu ninia bolsu.

“Hosi sira-nia serbisu, barak tebes mak halo ona mudansa iha sira-nia família no harii uma, halo negósiu hodi sustenta ekonomia família, haruka oan, alin, maun ba eskola iha nível hotu-hotu, ne’ebé ninia retornu ekonómiku hodi suporta Timor-Leste ninia kreximentu imediata no ba futuru,” eis Ministru Justisa ne’e fundamenta.

Ne’e duni, nia dehan, CNRT kondena ema polítiku sira ne’ebé hatún maluk sira-ne’e no husu ba timor-oan sira-ne’ebé serbisu iha rai-li’ur atu kontinua serbisu hodi hadi’a sira-nia moris no sira-nia família nia moris, aumezmu tempu tulun mós rai Timor-Leste.

“Mezmuke sira ba serbisu mesak maibé sira mós ajuda ona Governu Timor-Leste hamenus dezempregu no prepara mós sira-nia oan sira, aban bainrua bele filamai hodi dezenvolve ita-nia rai,” Dionísio tenik.

Deklarasaun polémika iha públiku ne’e relata hosi Ministru Agrikultura no Peska (MAP), Pedro dos Reis, ne’ebé interpreta programa cesta bázika ne’e importante nune’e timor-oan sira labele ba “fokit manu-fulun iha rai-li’ur”.

Ho deklarasaun ne’ebé hetan krítika maka’as hosi públiku no traballadór sira, reprezentante bankada parlamentár KHUNTO, Deputadu Luís Roberto, husu deskulpa.

“Ami hosi bankada KHUNTO husu deskulpa, karik liafuan ne’e la monu ba ita-boot nia laran,” deputadu Luís Roberto, hato’o deskulpa ne’e liuhosi debate proposta-lei orsamentu 2021, iha plenária Parlamentu Nasionál.

Deputadu Luís Roberto husu deskulpa ne’e hafoin Xefe bankada Partidu Demokrátiku, Deputadu António da Conceição “Kalohan” krítika governante ne’e tanba deklarasaun ne’e la merese fó ba traballadór timor-oan sira ne’ebé serbisu iha estranjeiru.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here