Osan Dolar Amerikanu. Imajen/Espesiál

DILI, 05 dezembru 2020 (TATOLI)—Parlamentu Nasionál (PN), iha sábadu (05/12) aprova orsamentu jerál Estadu (OJE) 2021 ba Ministériu Finansa (MF) ho montante $34.133.354.

Proposta OJE 2021 ba MF ne’e aprova ho rezultadu votasaun a-favór 41, kontra 0 no abstensaun 0.

Notísia Relevante :Ministru Finansa otimista OJE 2021 bele hasa’e kreximentu ekonómiku 3,9%

“Ho nune’e orsamentu Ministériu Finansa pasa,” Prezidente Parlamentu Nasionál, Deputadu, Aniceto Longuinhos Guterres Lopes, anúnsia liuhosi plenária PN,ohin.

Husi totál orsamentu ne’e fahe ba kategoria saláriu no vensimentu $3.372.689, bens no servisu $21.056.654, kapitál menór $9.054.115, kapitál dezenvolvimentu $649.896, no transferénsia públiku laiha.

Orsamentu MF nian mantein proposta antes no laiha redusaun ka aumenta.Orsamentu ne’ebé prevee sei kooresponde ba medida prinsipál setór 10 ba tinan 2021.

Medida prinsipál 10 ne’e maka hanesan reforma jestaun finansa públika, rekolla dadus no prodúz estatístika viável ho kualidade, jere OJE no asegura jestaun despeza públika ho transparánsia no rigór.

Nune’e mós, implementa programa setór finansa, apoiu orsamentál, mobiliza rekursu finanseiru no dívida públika.

Aleinde ne’e, mobiliza no jere rekursu esternu, promove efisiénsia no efikásia iha arrekadasaun reseita públika, jere ativu patrimóniu Estadu movél no imóvel, kondúz tramitasaun ein média projetu 5 to’o 6 komplesu liuhosi Komisaun Nasionál Aprovizionamentu (CAN-sigla portugés), no ikus promove governasaun di’ak no jestaun institusionál.

Entretantu tetu agregadu no dezagregadu proposta OJE 2021 ho montante biliaun $1,895, fahe ba kategoria saláriu no vensimentu millaun $239,26, bens no servisu millaun $421,49, transferénsia públika millaun $669,91, kapitál menór millaun $61,14, no kapitál dezenvolvimentu millaun $503,20.

Notísia Relevante :PN aprova proposta OJE 2021 iha jeneralidade

Jornalista:Antónia Gusmão. 

Editór:Agapito dos Santos

HAKEREK NO HATÁN

Please enter your comment!
Please enter your name here