Prezidente Autoridade Munisípiu Manufahi, Arantes Isaac Sarmento. Imajen/Egas Cristovão

MANUFAHI, 04 dezembru 2020 (TATOLI)—Administradór Interinu Munisípiu Manufahi, Arantes Isaac, husu ba Institutu Petróliu no Jeolojia (IPG-sigla portugés) atu halo estudu espesífiku ida iha foho Kablaki Munisípiu Manufahi.

Peskiza ne’e atu identifika loloos rikusoin saida maka daudaun ne’e seidauk dekobre iha fatin ne’ebá, tanba antes ne’e, kompañia balun tenta atu foti fatuk balun iha fatin refere.

Notísia Relevante :Manufahi risku ba inundasaun ho kategoria aas liu

“Nu’udar Manufahi-oan hakarak husu ba IPG se bele karik tau ekipa ida mai espesifíku liu halo estudu iha área kablaki, tanba fatin ida ne’e kuandu uluk kompañia halo obra iha área refere sira utiliza fali fatuk ida ne’e para ba fali atividade ha’u rasik to’o iha terrenu hodi la autoriza,” dehan Arantes, durante programa desiminasaun informasaun husi IPG kona-ba risku jeolójiku ne’ebé hala’o iha salaun Administrasaun Manufahi, Sesta (04/12).

Bainhira IPG deskobre loloos ona rikusoin iha área ne’eba sei tulun Autoridade Munisipál Manufahi atu proteze husi atividade komérsiu ilegál.

“Iha Lautem iha parke Nino Koni Santana ne’ebé iha Kablaki ami tau KayRala Xanana Gusmão, tanba ne’e maka husu atu ekipa ida mai haree detallu liu para ajuda munisípiu tanba liga ho polítika dezentralizasaun lakleur tan se halo mós polítika evolusaun lei ordenamentu territóriu,” katak nia.

Entretantu, Peskizadora área rai halai husi IPG, Joaquina Imaculada Mendes, husu ba populasaun munisípiu ne’e atu fó atensaun bainhira hala’o movimentu ho transporte iha área ne’ebá tanba fatuk sempre monu.

“Ami identifika katak área Kablaki ne’e fatuk sempre monu, no mós iha fatuk maromak nian, área ne’e fatuk sira monu besik hela iha dalan ninin ne’ebé husu ita hotu la’o atensaun nune’e fatuk monu labele afeta ba ita sira la’o ba mai hosi dalan ne’e,” dehan Joaquina Madalena Mendes.

Notísia Relevante :IPG partilla informasaun kona-ba risku jeolójiku ba Autoridade Manufahi

Jornalista: Antónia Gusmão

Editór: Agapito dos Santos

HAKEREK NO HATÁN

Please enter your comment!
Please enter your name here