Jogadór Boavista FC Timor, hafoin hatama golu ba guarda rede Assalam FC bainhira joga iha Tasa 12 Novembru 2020 iha Estadiu Munisipál Dili, Sabadu (14/11). Imajen Tatoli/António Gonçalves

DILI, 04 dezembru 2020 (TATOLI) – Treinadór Baovista FC Timor, Miro Baldo Bento hateten, sira-nia preparasaun ba semi finál tasa 12 Novembru, sábadu aban (05/12), kontra Lalenok United FC, la dun másimu tanba jogadór importante Francyatma Kefi (21) daudaun ne’e “akumulasi” hela kartaun kinur.

Notísia Relevante : Tasa 12 Novembru, DIT konsidera John Frith xave ba SLB nia vitória

Gally, jogadór hosi Lalenok FC hiit liman-rua hodi selebra vitória. Imajen/Dok. Mídia FFTL

Boavista kompete iha jogu ne’e, maibé sente hanesan triste boot ida tanba klube refere konsidera Kefi hanesan mós jogadór prinsipál iha Boavista.

“Preparasaun ami nian ba iha jogu ne’e, ladún másimu tanba ami nia jogadór importante Kefi aban labele tuir jogu ne’e. Ida ne’e mak ba ha’u sente triste boot ida,” nia dehan ho oin triste ba Jornalista-sira, ohin, iha Estádiu Munisipál Dili.

Maski laran triste, Miro nafatin konsidera jogu hotu ba Boavista importante, nune’e hanesan treinadór nia sei buka meiu oinsá hodi lansa estratéjia di’ak hodi manan Lalenok United FC.

“Ami joga aban ho Lalenok ne’e importante boot liu tanba iha jogu semi finál. Ami hakarak halo istória iha tasa 12 Novembru, epoka ne’e, atu ami sai vensedór,” nia dehan.

Kona-ba Lalenok nia jogu nia respeitu no lakohi fó komentáriu kle’an atu hamate ka la hamate, maibé jogu hotu minute 90 mak sei termina iha kampu-laran.

Iha sorin seluk treinadór Lalenok  United FC, Simón Elissetche hateten, Boavista maioria jogadór selesaun nasionál ne’ebé iha esperiénsia barak, nune’e sira sei monta estratéjia oinsá bele manan jogu ne’e.

Tuir istória futeból iha Timor-Leste ekipa rua hasoru malu dala-tolu ona; iha Liga Futeból Amadora (LFA) 2019 iha Estádiu Munisipál Dili Boavista konsege manan Lalenok ho golu 2-1.

LFA 2019 segunda jornada mós ekipa rua nafatin hasoru malu maibé Boavista nafatin manan ho score 3-2 no ikus liu ekipa rua hasoru malu iha semi finál  kopa Federasaun Futeból Timor – Leste (FFTL) 2020 Lalenok konsege manan Boavista ho score 3-2 iha Estádiu Café Gleno.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here