Prezidente Repúblika, Francisco Guterres Lú Olo. Imajen António Gonçalves

DILI, 04 dezembru 2020 (TATOLI)—Prezidente Repúblika, Francisco Guterres Lú Olo, iha 3 dezembru 2020, dekreta Estadu Emerjénsia daualuk ba loron loron tolu-nulu (30), hahú husi tuku 00.00 iha 04 dezembru 2020 no termina iha tuku 23.59 iha 02 janeiru 2021, iha territóriu nasionál tomak.

Estadu Emerjénsia sei parsialmente suspende direitu ba sirkulasaun internasionál, liberdade sirkulasaun no fixasaun rezidénsia ba kualker pontu iha territóriu nasionál no direitu ba rezisténsia.

Autoridades públikas kompetentes sei impoin restrisaun nesesária sira ba redusaun risku hada’et nian no ezekuta medida prevensaun no kombate epidemia, hanesan distansiamentu sosiál, kuarentena ba suspeitu infesaun, izolamente ba moras no suspeitu sira, konfinamentu domisiliáriu, uzu obrigatóriu máskara, fase-liman no distánsia fízika.

Prezidente Repúblika dekreta Estadu Emerjénsia hafoin Parlamentu Nasionál, iha 3 dezembru, fó autorizasaun ba renovasaun.

Iha 30 novembru, membru Konsellu Superiór Defeza no Seguransa no Konsellu Estadu konkorda ho Governu nia pedidu atu renova Estadu Emerjénsia.  Membru konsellu rua ne’e rekomenda ba Prezidente Repúblika atu hato’o mensajen ba Parlamentu Nasionál husu autorizasaun ba renovasaun estadu emerjénsia tuir pedidu hosi Governu.

Pedidu Governu ba estensaun Estadu Emerjénsia ninian tanba haree ba evolusaun preokupante ba situasaun epidemiolójika no proliferasaun kazu rejistadu ho COVID-19 ne’ebé aumenta iha nível rejionál no nível mundiál. Tuir dadus hosi Organizasaun Mundiál Saúde (OMS), iha 1 dezembru 2020, COVID-19 hada’et ona ba ema liu millaun neen-nulu-resin-tolu no hamate ema liu millaun ida rihun atus haat.

Organizasaun Mundiál Saúde fó-sai katak iha Indonézia, iha 1 dezembru, moras ne’e hada’et ona ba ema liu rihun atus lima no rihun sanulu resin hitu mak mate ona. Iha provinsia Nusa Tenggara, ne’ebé Timor-Leste fahe nia fronteira, iha ona kazu pozitivu rihun atu rua haat nulu resin no hamate ona ema sanulu resin sia.

Dezde fulan marsu, COVID-19 nu’udar moras importadu, Timor-Leste implementa kedas Estadu Emerjénsia bainhira rejista kazu pozitivu ida. Implementasaun Estadu Emerjénsia nu’udar medida preventiva no kontrolu COVID-19 atu hasees sidadaun hotu-hotu hosi kalamidade públika.

Ohinloron Timor-Leste rejista kazu pozitivu na’in-ida. Desde marsu 2020 to’o ohinloron, ema na’in-30 rekuperadu no laiha ema ida mak mate.

Komunikadu Imprensa

HAKEREK NO HATÁN

Please enter your comment!
Please enter your name here