Prezépiu Natal/Imajen foti husi Google

AINARO, 03 dezembru 2020 (TATOLI)—Komandu Polisia Nasionál Timor-Leste (PNTL) Munisípiu Ainaro hasai ona regulamentu hamutuk 17 kona-ba harii prezépiu hodi komemora loron natal 2020 no tinan foun 2021 atu populasaun bele kumpre hodi garante páz no estabilidade.

Regra 17 ne’ebé maka PNTL Munisípiu ne’e prodúz ona hanesan harii prezépiu dook husi estrada públiku ho distánsia metru lima, labale sunu fugetis, labele rai sasán kro’at iha prezépiu laran, labele toka múzika festa ka la relevante ho natal no tinan foun, labele lanu iha besik prezépiu, labele kobra osan, labele taka dalan (tau roda, fatuk ka sasán seluk) iha prezépiu oin, labele barullu (dansa, hakilar no namora malu) besik prezépiu.

Notísia Relevante :Harii prezépiu Natal tenke ho distánsia metru 10 hosi estrada

Komandante PNTL Ainaro, Superintendente Xefe Polisia Justino Menezes, hateten nia parte hasai ona diretiva ne’e iha loron 02 fulan-dezembru 2020.

No oras ne’e distribui ona ba Administradór Postu, Xefe Suku, Aldeia Konsellu Polisiamentu Komunitária (KPK), Ofisiál Polisia Suku, Parókia Ainaro atu informa ba komunidade no sarani sira.

“Iha loron natal ne’e asidente no insidente mosu barak liu mak fatin sira harii prezépiu entaun komandu Ainaro hasai diretiva ida hodi hamosu regreza sira, iha loron 2 dezembru ne’e diretiva ne’e fahe ona, bele harii prejepiu maibé iha regra ba utilizasaun, regra hamutuk 17 ne’ebé komandu fó sai,” dehan nia ba Tatoli iha edifísiu Administrasaun Ainaro, kinta ne’e.

Komandante ne’e, dehan bainhira komunidade sira la kumpre no viola  regulamentu  hirak ne’e autoridade seguransa sei ezekuta orden maka taka totálmente prezépiu iha fatin akontesimentu.

“Diretiva ne’e hato’o ba Igreja nune’e fó sai iha misa, fó sai iha reuniaun boot sira, no fó sai iha tempu bazar, nune’e mós fó sai liuhosi rádiu komunidade Tatamailau no Radio komunidade Maubisse. Regra ne’e mós sei lori ba kada prezépiu hodi entrega ba xefe prezépiu,” nia esplika.

Komando PNTL Ainaro garante sei asegura páz no estabilidade ba komunidade tanba iha membru polisia hamutuk ema 120, ne’ebé koloka iha eskuadra haat, no mós iha fasilidade sufisiente atu apoiu patrullamentu durante festa natal no tinan foun.

“Iha Ainaro ami sempre garante seguransa la’o di’ak iha eventu boboot sira ne’ebé realiza iha munisípiu, ami nia pesoál hamutuk 120 fahe ba eskudra haat no postu sira,” Justino Menezes dehan.

Mezmu nune’e, nia rekoñese dalaruma enfrenta difikuldade mak kombustivel no reparasaun transporte sira. Maibé nia otimista katak sei la difikulta servisu operasionál sira.

Notísia Relevante :Sobu Prezépiu, Polísia Detein Joven Na’in 8

Jornalista: Antónia Gusmão

Editór: Agapito dos Santos

HAKEREK NO HATÁN

Please enter your comment!
Please enter your name here