Imajen/Media PN.

DILI, 04 dezembru 2020 (TATOLI)—Orsamentu hosi Parlamentu Nasionál ho montante millaun $16-resin aprovadu iha faze espesialidade iha debate proposta-lei Orsamentu Jerál Estadu (OJE) tinan fiskál 2021.

Parlamentu Nasionál nia orsamentu ho montante $16.984.066 ne’ebé fahe ba saláriu no vensimentu $5.581.083, bens no servisu $6.250.029, kapitál minór rihun $492.796, kapitál dezenvolvimentu $3.000.000 no transferénsia públika $1.660.203

Reprezentante povu sira aprova sira-nia orsamentu ho rezultadu votasaun a-favór 43, kontra 0 no abstensaun 0.

“Orsamentu ba Parlamentu Nasionál aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, debate espesialidade loron dahuluk, sesta ne’e.

Bazeia ba livru Planu Asaun (Livru 2) deskreve medida prinsipál setoriál hosi Parlamentu Nasionál ba tinan 2021 mak ezerse efetivamente nu’udar funsaun konstitusionál Parlamentu Nasionál, liuhosi reforsa kapasidade interna, nune’e ezekusaun funsaun fiskalizasaun ba asaun Governu no Administrasaun Públika la’o ho di’ak.

Media prinsipál daruak kontinua implementa polítika jéneru iha Parlamentu Nasionál liuhosi proposta orsamentu 2021.

“Promove kultura abertura (nakloke) no transparénsia iha Parlamentu Nasionál, inklui envolve partisipasaun sosiedade sivíl iha atividade parlamentár no lejizlativa, nune’e prosesu desizaun polítika sira no fiskalizasaun ba asaun fiskalizasaun hasoru asaun governativa transparente liu,” refere dokumentu ne’ebé deskreve iha Planu Asaun (livru 2), ne’ebé Agência TATOLI asesu, sesta ne’e.

Medida prinsipál ikus liu hosi Parlamentu Nasionál mak reforsa boa governasaun no jestaun institusionál no reforsa kapasidade rekursu umanu.

Entretantu, iha loron 29 setembru 2020 liubá, Parlamentu Nasionál (PN) aprova orsamentu privativu iha finál globál ho montante $16.984.066 ba tinan fiskál 2021.

Iha biban ne’e, Parlamentu Nasionál aprova rezultadu votasaun a-favór 41 Kontra 0 no abstensaun 8.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here