Arguidu no ariguida Xineza na'in-rua ne'ebé SIC detein iha sira-nia servisu fatin iha area Becora, Dili, sesta (04/12). Imajen Tatoli/Eugénio Pereira

DILI, 04 dezembru 2020 (TATOLI)-Komandu Polisia Nasionál Timor-Leste (PNTL) liu hosi Servisu Investigasaun Kriminál (SIC), ohin, purvolta tuku 11:30 Otl, detein negosiante Xineza na’in-rua  (feto ida no mane ida) ne’ebé envolve iha kazu esplorasaun seksuál ne’ebé akontese iha 2016.

Tuir mandadu detensaun Tribunál nian ho númeru NUC 0245/16.PNSIC halo detensaun ba arguidu/a Xineza na’in-tolu, ho inisiál LXZ, BHL no LHL, maibé bainhira SIC to’o iha sira-nia servisu fatin iha area Becora- Dili, maibé arguida LHL halai subar tiha.

Arguidu/a na’in-tolu ho inisiál LXZ, BHL no arguida JHL ninia kazu hala’o ona prosesu julgamentu iha Tribunál hodi prova sira-nia envolvimentu iha kazu esplorasaun seksuál kontra kódigu penál 174.

Parte SIC hamutuk ho Servisu Informasaun Polísia (SIP) sei buka tuir paradeiru suspeitu hodi kaptura.

Hafoin detein tiha suspeitu na’in-rua, SIC lori kedas suspeitu hala’o auto entrega iha Prizaun Becora, Dili, tuir desizaun Tribunál atu suspeitu sira kumpre pena prizaun.

Tuir desizaun Tribunál, arguidu sira viola artigu 174 ne’ebé sita iha Seksaun III kona-ba Esplorasaun Seksuál artigu 174 kona-ba esplorasaun seksuál ba terseiru  hanesan 1), Sé mak iha hanoin atu hetan benefísiu ka iha nia moris buka soran lia, fasilita ka halo oinsá kontribui, atu nune’e, ema seluk halo prostituisaun ka pratika asaun seksuál sira seluk sei kondena ho pena prizaun to’o tinan tolu.  2),  Ema ne’e sei kondena ho pena prizaun hosi tinan rua to’o 10 bainhira mosu sirkunstánsia sira balun tuirmai:

 a). Esplorasaun iha situasaun husik hela ka nesesidade ekonómika vítima nian

 b). Halo violénsia, ameasa grave ka haka’as ho beran hasoru vítima

c). Lori vítima ba nasaun seluk hosi rai ne’ebé nia moris ka hela ba no 3),  tentativa iha kazu númeru 1 sei hetan kastigu.

To’o notísia ne’e hatún, Agência Tatoli tenta konfirma ho arguidu/a sira-nia advogadu, maibé la hetan asesu klaru.

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here