Família hosi na’in ba propriedade privadu rezidénsia Central Otél taka Loja Ali Textil Di’ak Lda, iha Bairru Formosa Acait, Dili. Imajen Tatoli/ António Gonçalves

DILI, 04 dezembru 2020 (TATOLI)- Disputa arrendamentu uma durante tinan-tolu la selu, obriga família na’in ba rai no uma tenke uza forsa halo asaun taka obrigatóriu Loja Ali Textil Di’ak Lda ne’ebé lokaliza iha Bairru Formosa, Akait, Dili.

Reprezentante família nu’udar na’in ba rai no uma, Afonso Cortereal. Imajen Tatoli/Eugénio Pereira

Reprezentante família nu’udar na’in ba rai no uma, Afonso Cortereal, informa iha loron 01 setembru 2015, entre parte sira halo akordu kontratu arrendamentu entre na’in ba rai, Tjia Soh Siang (matebian) ne’ebé legálmente rekoñese nu’udar na’in ba propriedade privadu ba rezidénsia Central Otél hodi fó aluga ba Pakistaun ho naran Jamil Fahad nu’udar kliente aluga uma.

Tuir akordu, fó aluga ba proprietáriu iha loja oin lokalidade iha Central Otél, 37 Avenida Prezidente Nicolau Lobato, Formosa, Dili, hodi oferese ba nia kliente Jamil Fahad hodi harii Loja Textile fa’an roupa no hena.

Durasaun ba aluga ne’e durante periodu tinan-tolu, komesa hosi loron 01 setembru 2015 to’o 2018, ho opsaun bele halo estensaun ka hapara kontratu bazeia ba akordu eskrita entre parte-sira.

Iha prosesu implementasaun, tanba na’in ba rai Tjia Soh Siang mate, nune’e prosesu selu kontinua ho matebian nia oan-mane, Jonathan, maibé prosesu pagamentu la’o paradu to’o mosu problema entre parte rua to’o lori kazu ba iha Tribunál to’o agora seidauk hetan solusaun.

“Kontratu hotu tiha ona depois nia (Jamil Fahad) lakohi selu kontratu arrendamentu durante ne’e, tanba ne’e ami husu nia atu sai, maibé nia lakohi sai, tanba ne’e ohin ami tenke obriga nia sai, mezmu problema ne’e lori ona ba tribunál,” dehan Afonso Cortereal, ohin, ba jornalista iha Acait, Dili.

Afonso dehan, kliente Jamil Fahad la’ós de’it hapara pagamentu ba arrendamentu, maibé, Fahad lakohi sai hosi uma ne’e, mezmu durante ne’e uma-na’in aviza no halo karta legál hodi husu Fahad atu sai hosi uma tuir akordu ne’ebé remata ona.

Iha kontratu ne’ebé sira halo, kada fulan ida, Fahad tenke selu kontratu arrendamentu $1,500, no durante tinan-tolu, 2015 to’o 2018 ho montante $36,000.

“Uluk ha’u nia kuñadu (Tjia Soh Siang) maka asina akordu ho Fahad iha fulan setembru 2015 to’o 2018, agora tinan-tolu remata ona, nia lakohi sai, entaun ami dehan lae, to’o ona, nia tenke sai para ami atu hadi’a fali uma ne’e hodi halo negósiu seluk,” tenik nia.

Patraun Ba Loja Ali Textil Di’ak Lda, Jamil Fahad. Imajen Tatoli/António Gonçalves

Iha fatin hanesan Patraun Ba Loja Ali Textil Di’ak Lda, Jamil Fahad deklara durante akordu asina ne’e nia kontinua selu hela to’o matebian Tjia Soh Siang mate, sira kontinua selu ba matebian nia oan mane, Jonathan.

“Ha’u sente triste tebes tanba iha evidénsia no dadus hotu, tanba ami nia kontratu la’ós senora sira ne’ebé ohin ho forsa mai hasai ami ne’e, kontratu ami halo iha tinan 2015 ho matebian (Tjia Soh Siang) to’o nia mate, maibé ami kontinua selu fali ba matebian nia oan mane, Jonathan,” tenik nia.

Fahad mós rejeita deklarasaun ne’ebé parte família uma-na’in dehan, nia la selu durante tinan-tolu ne’e laloos.

“Ha’u la rekoñese sira, ha’u tuir mak kontratu ne’ebé asina. Ha’u selu ba matebian nia oan mane (Jonathan), no ha’u la viola akordu ruma, no ha’u mós prontu lori kazu ne’e ba tribunál para buka justisa,” nia hateten.

Fahad triste tebes tanba asaun família lori forsa taka nia loja fó impaktu ba nia negósiu no halakon direitu traballadór Timoroan na’in-ualu (8) ne’ebé servisu ba nia durante tinan 2015 to’o agora.

Prezidente Asosiasaun Komersiál Komunidade Xineza (ACCCTO, sigla Portugés) iha Timor-Leste, Kathleen Gonçalves . Imajen Tatoli/Eugénio Pereira

Iha fatin hanesan, Prezidente Asosiasaun Komersiál Komunidade Xineza (ACCCTO, sigla Portugés) iha Timor-Leste, Kathleen Gonçalves deklara nia sente triste tebes, tanba negosiante estranjeiru aluga tiha uma la selu no viola regra no lei Timor-Leste.

Kathleen hatutan, uma-na’in iha baze legál atu hapara kontratu, bainhira kliente ne’ebé aluga la selu.

“Se ema ida mai aluga tiha uma lakohi selu, ne’e viola ona konkordánsia mútua no lei, tanba uma-na’in iha dokumentu kompletu para atu obriga sira-sai,” nia hateten.

Kathleen hatutan, sira-nia parte prontu koopera nafatin ho negosiante Fahad hodi buka solusaun ho uma-na’in hodi hasai sasán.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here