Atividade iha sala plenária Parlamentu Nasionál. Imajen TATOLI/António Gonçalves.

DILI, 04 dezembru 2020 (TATOLI)—Deputadu sira iha Parlamentu Nasionál propoin proposta alterasaun hamutuk 121, maibé Bankada Conresso Nacional da Reconstrução de Timorense (CNRT) deside retira proposta aletrasaun hamutuk 57.

Molok tama ba debate espesialidade, Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária katak proposta alterasaun hamutuk 121 inkuli proposta 57 parte bankada CNRT nian.

Aniceto Guterres, esplika rekerimentu atu aumenta, hatuun ka mantein tenke hetan justifikasaun detallada hosi proponte sira, nune’e mós hosi Governu bainhira atu aseita proposta ruma tenke justifika.

Aniceto realsa, prinsípiu sira-ne’e mak sei orienta diskusaun iha espesialidade kona-ba liña orsamentál durante debate espesialidade ne’e to’o remata.

“Proposta iha 121 admitidu, horiseik to’o kalan ha’u foin halo admisaun hotu, ne’e inklui 57 proposta hosi bankada CNRT. Ha’u hakarak husik hela kestaun previa ba plenária ida-ne’e atu pronúnsia, liuliu hosi bankada CNRT kona-ba proposta 57 ne’ebé mai hosi deputadu sira bankada CNRT ne’e atu mantein ka retira tanba haree ba deklarasaun polítika iha intervensaun finál debate jeneralidade nian bankada CNRT deklara sei la hola parte iha kualkér tomada desizaun ba orsamentu ida-ne’e,” Aniceto Guterres anunsia liuhosi plenária Parlamentu Nasionál, sesta ne’e.

Prezidente Parlamentu Nasionál halo interpretasaun katak,se kualkér tomada desizaun ne’e inklui mós desizaun kona-ba liña orsamentál tuir proposta ne’ebé iha.

Nune’e reprezentante bankada CNRT, Deputada Maria  Fernanda Lay, bankada CNRT deside retira proposta hotu. 

“Ami-nia desizaun walk out, ha’u retira proposta ne’ebé ha’u sai proponente no proposta hotu-hotu (todas as propostas),” deputada bankada CNRT esklarese liuhosi plenária.

Hatán ba pronunsiamentu hosi bankada CNRT ne’e, Prezidente Parlamentu Nasionál, Aniceto Lonuinhos Guterres Lopes, agradese bankada CNRT.

“Signifika proposta 57 ne’e retirada,” anunsia Aniceto Guterres.

Desizaun ne’e foti tanba iha debate jeneralidade loron ikus, Vise-Xefe Bankada CNRT, Deputadu Patrocínio Fernandes dos Reis, fó-sai katak, sei la invole tomada desizaun proposta OJE 2021.

“Ami iha mekanizmu rasik atu mantein silénsiu hodi la foti desizaun ba kualkér aprovasaun OJE ida-ne’e,” Vise-xefe Bankada CNRT hateten.

Bankada CNRT propoin elimina montante orsamentu rihun $216 hosi Sekretaria Estadu, Juventude no Desportu (SEJD) tanba labele destina iha rúbrika outros serviços diversos maibé tenke refere ba programa ne’ebé klaru, labele temi de’it “outros servicós”. Proponente proposta alterasaun mak hanesan deputadu Gabriel Soares, Oscar de Araújo no deputada Maria Terezinha Viegas.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here