Prezidente Partido Democrático (PD), Mariano "Asanami" Sabino. Imajen/Antonio Goncalves

DILI, 04 dezembru 2020 (TATOLI)—Bankada Partidu Demokrátiku (PD) propoin $50,000.00 hosi fundu rezerva hodi bele halo akizisaun ba fini ortikultura nune’e fasilita grupu agrikultór sira iha proposta-lei Orsamentu Jerál Estadu (OJE) tinan fiskál 2021.

“Ho nune’e, bankada Demokrátiku propoin atu aumenta tán $50,000.00 hosi fundu rezerva hodi bele halo akizisaun ba fini ortikultura nian atu-bele fasilita grupu agrikultór sira,” proposta alterasaun ne’ebé propoin hosi deputadu Mariano Assanami Sabino, António da Conceição no Adriano do Nascimento, ne’ebé Ajénsia TATOLI asesu iha Parlamentu Nasionál, sesta ne’e.

Deputadu Mariano Assanami Sabino, argumenta se Timor-Leste ba soberania alimentár entaun tenke hasa’e produsaun tenke iha intervensaun fini ho kualidade.

“Atu hasa’e produsaun ho produtividade tenke ho fini kualidade entaun ita tenke halo intervensaun iha fini. Se ita la interven iha fini entaun populasaun kuda saida mak nia han,” esplika Prezidente Partidu Demokrátiku ne’e.

Assanami fundamenta, atu hasa’e produsaun métodu kuda ne’e tenke muda, fini tenke kualidade no bee tenke garante nune’e hasa’e fini ortikultura ho kualidade.

Assanami fiar katak proposta ho númeru 23 ne’e sei pasa iha plenária tanba reprezentante povu sira maioria ko’alia kona-ba soberania alimentár.

“Uluk, ha’u sei Ministru Agrikultura no Peska (MAP), ha’u mai sadik deputadu sira katak sei imi konsidera mehi ne’ebé MAP nian tinan lima de’it produsaun hotu ona, proudusaun rai-li’ur la-mai ona. Uluk ha’u sei lidera MAP produsaun batar ne’e konsege atinje tonelada rihun 140, hare to’o tonelada rihun 120, ne’e la’ós MAP nia data, maibé FAO mak fó-sai. Agora nein metade,” Assanami haktuir.

Bankada Demokrátika nia justifikasaun sumáriu ne’ebé argumenta iha proposta alterasaun ne’e refleta ba polítika VIII Governu ne’ebé atu halo rekuperasaun ekonómiku.

Tanba ne’e maka Diresaun Nasionál Ortikultura presiza fasilita grupu argrikultór sira, liuliu grupu sira-ne’ebé durante ne’e nia moris depende ba kuda modo hodi sustenta sira-nia moris loron-loron nian atu-bele hasa’e produsaun modo hodi bele responde  ba nesesidade merkadu no konsumidór sira.

Bankada Demokrátiku mós propoin tratorista sira hamutuk na’in-329 ne’ebé servisu fila-rai iha tempu bailoron hetan de’it osan $5 kada loron ba loron 80.

Ho situasaun ne’ebé tratorista sira enfrenta, bankada Demokrátiku propoin $131,600.00 hosi fundu kontijénsia atu-bele aumenta $5 dollar kada ema-ida (pesoa) atu-bele auguenta  hodi halo operasionalizasaun tratór durante loron 80 nia laran.

Nune’e mós ba pesoál estensionista sira hamutuk na’in-500 iha territóriu nasionál presiza aumenta $450,000.00, nune’e fasilita estensionista sira $25 kada pesoál ba kada kategoria  estensionista sira (seniór, koordenadór, postu no suku).

Jornalista: Evaristo Soares Martins

Editor: Cancio Ximenes

HAKEREK NO HATÁN

Please enter your comment!
Please enter your name here