Primeiru Ministru, Taur Matan Ruak. Imajen TATOLI/Egas Cristovão

DILI, 03 novembru 2020 (TATOLI)--Primeiru Ministru (PM), Taur Matan Ruak, hateten razaun ba protesaun saúde públika iha Timor-Leste, Governu husu ba Parlementu Nasionál atu fó autorizasaun ba Prezidente Repúblika, Francisco Guterres ‘Lú Olo’ dekreta Estadu Emerjénsia (EE) ba daualuk.

“Governu mai dala-ida tan atu husu Parlamentu Nasionál fó autorizasaun  Estadu Emerjénsia daualuk hodi taka fronteira sira no entrada hotu inklui inpoin kuaretena obrigatóriu no izola sira ne’ebé iha moras, kontinua distansiamentu sosiál, uzu máskara, fase liman no multa ba sira ne’ebé tama-sai ilegalmente iha ita-nia rai,” Xefe Governu afirma durante apresiasaun pedidu autorizasaun atu renova Estadu Emerjénsia  dahitu, iha sala plenáriu Paralemntu Nasionál, kinta ne’e.

Tuir dadus Organizasaun Mundiál Saúde (OMS), pandemia COVID-19 hatudu kapasidade alastramentu no propagasaun boot tebes ba nasaun 216, afeta ona ema millaun 64,4, ema millaun 41,4 mak rekupera no hamate ema millaun 1,4.

PM Taur dehan, Timor-Leste tanba grasa no esforsu sosiedade hotu konsege indentifika kazu infetadu hotu ne’ebé mai husi rai-li’ur hodi halo izolametu teropéutiku ba infetadu sira hotu ba fatin seguru no evita alastramentu iha komunidade nia le’et inklui halakon vírus ne’e rasik.

“Medida sira ne’e hotu só bele implementa ho di’ak bainhira ita limita ema nia direitu hanesan sirkulasaun internasionál, liberdade sirkulasaun no fiksasaun rezidénsia, direitu rezidénsia pasiva no ativa liuhosi ordén ne’ebé autoridade públiku sira fó sai . Ida-ne’e konsege se ita renova Estadu Emerjénsia,” Xefe Ezekutivu ne’e afirma.

COVID-19 iha Timor-Leste seidauk halakon ema nia vida, tanba ne’e Governu presiza kontinua asegura nafatin vizilánsia epidémolojia hodi prevene no hamenus posibilidade importasaun vírus ne’e mai rai-laran.

Tan ne’e, Xege Governu ne’e husu deputadu sira iha Parlamentu Nasionál atubele autoriza estesnaun EE ba daualuk atu Prezidente Repúblika dekreta ba loron-30.

Pedidu Governu ba estensaun EE tanba haree ba evolusaun prokupante ba situasaun epidemiolójoka no prolifreasaun kazu rejistu ne’ebé aumenta iha nível rejionál no mundiál.

EE dahitu hahú tuku 00:00 loron 04 novembru 2020 (kuarta) no ramata iha tuku 23:59, loron 03 dezembru 2020 (kinta).

Nune’e, Pedidu foun ba estesaun EE daualuk hahú tuku 00:00, loron 04 dezembru 2020 (kinta) no ramata iha tuku 23:59, loron 02 janeiru 2021.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here