Provedora Direitu Umanu no Justisa, Jesuína Maria Ferreira Gomes. Imajen Tatoli/Egas Cristóvão

DILI, 03 dezembru 2020 (TATOLI)—Provedora Direitu Umanu no Justisa (PDHJ sígla portugés), Jesuina Maria Ferreira Gomes, informa hosi 2018-2020 ne’e PDHJ rejista keixa lima (5) hosi Ema ho Defisiénsia (EhD) sira.

“Keixa ida taka no haruka ba instituisaun relevante. Kazu rua konklui ona investigasaun ho rekomenadasaun no sujestaun. Kazu ida halo hela monitorizasaun no keixa ida seluk iha hela prosesu Relatóriu Avaliasaun Preliminar (RAP),” Jesuina Maria Ferreira Gomes, fó sai dadus ne’e bainhira hato’o mensajen ba komemorasaun Loron Mundiál ba Ema ho Defisiénsia ne’ebé selebra iha Centro Convenção Dili (CCD), kinta ne’e.

Nia esplika, iha estatutu artigu 8 fó kompeténsia ba PDHJ atu garante katak ema ho defisiénsia sira bele hetan benefísiu hosi knaar sira-ne’ebé provedoria hala’o, inklui prosesa keixa relasiona ho violasaun direitu umanu no violasaun ba boa governasaun hasoru Ema ho Defisiénsia sira halo advokasia ba Estadu Timor-Leste hodi aselera ratifikasaun ba konvensaun direitu Ema ho Defisíensia, asegura protesaun ba ema vulnerável, feto, labarik, idozu no LGBTI.

Tuir nia, PDHJ nia papél importante mak atu asegura direitu Ema ho Defisiénsia sira-nian tenke hetan respeita no atende hosi instituisaun Governu, ONG no sosiedade ein jerál.

Atu atinje ida-ne’e, nia hatutan, Instituisaun Nasionál Direitus Umanus sei halo monitorizasaun, implementa no enkoraja polítika no prosedimentu bazeia ba konvensaun.

Provedora reforsa tan katak, PDHJ sai membru ba grupu traballu ba direitu Ema ho Defisiénsia ne’ebé lidera hosi MSSI no ADTL, inklui partisipa no hato’o komentáriu ba iha esbosu dekretu lei kona-ba Konsellu Nasionál ba Ema ho Defisénsia.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here