Komandante Polísia Munisípiu Dili, Superintendente Xefe Hendrique da Costa. Imajen Tatoli/Dok.

DILI, 03 dezembru 2020 (TATOLI)- Komandu Polísia Munisípiu Dili servisu hamutuk ho Komandu Jerál PNTL no Komandu Unidade-sira hodi forma forsa konjunta koloka seguransa  ba festa Natál , 24-25 dezembru 2020 no Tinan Foun, 1-3 janeiru 2021 iha fatin-sira ne’ebé tama lista risku  konflitu.

Komandante PNTL Munisípiu Dili, Superintendente Xefe, Henrique da Costa dehan, iha área Dili ne’e parte PNTL prepara ona númeru efeitu hodi halo seguransa ba fatin públiku no Igreja sira iha Dili hodi evita konflitu durante selebrasaun Natál no Tinan Foun.

“Ita halo ona pedidu ida ba komandu jerál, ita hetan apoiu hosi parte ekipa Unidade Polísia Marítima, Unidade Patrullamentu Fronteira (UPF), Kuartél Jerál PNTL no Unidade Espesiál Polísia (UEP) hodi halo operasaun iha tempu kalan hodi halo prevensaun, tanba ita halo ona analiza fatin krime maioria mosu iha tempu kalan,” Komandante Henrique hateten ba jornalista, ohin, iha Komandu PNTL, Caicoli, Dili.

Ekipa-sira ne’ebé parte Komandu Jerál PNTL deside hahú ona hala’o operasaun iha tempu-kalan no loron  hodi halo apreensaun ba sasán kro’at ne’ebé kontra lei arma branka no apreensaun ba fogete ilegál.

Iha área tránzitu nian, parte PNTL reforsa seguransa kontrolu movimentu transporte públiku hodi minimiza asidente tráfegu no engarrafamentu no operasaun ba karreta Estadu.

Parte PNTL mós koordena ho Igreja Katólika hodi fó seguransa ba selebrasaun misa Natál no Tinan Foun.

Komandu PNTL mós kontinua koopera ho Ofisiál Polísia Suku (OPS) no Konsellu Polisiamentu Komunitáriu (KPK) hodi asegura nafatin seguransa iha suku 31 ne’ebé pertense ba área jurizdisaun Munisípiu Dili.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here