Diretór Jerál Ministeriu Soliedariedade Sosial Rui Manuel Gago Exposto.Imajen/Tatoli Egas Cristovao.

DILI, 03 dezembru 2020 (TATOLI)—Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten Estadu no Governu Timor-Leste (TL) iha kompromísu boot atu promove no proteje sidadaun defisiénsia hanesan hatuur ona iha artigu 21 Konstituisaun Repúblika Demokrátika Timor-Leste (K-RDTL).

Nia hatutan, atu implementa KRDTL Governu TL liuhosi Konsellu Ministru (KM) hasai ona rezolusaun númeru 15/2011, 18 maiu, hamosu grupu traballu multidisiplina hodi kria polítika nasionál inkluzaun, promosaun direitu ba Ema ho Defisiénsia (EhD).

Diretór ne’e hateten, liuhosi Parlamentu Nasionál (PN) ne’ebé ho nia númeru rezoluzaun 21/2012, 3 de outubru, rekomenda ba Governu atu adopta medida relativa ba Ema ho Defisi’ensia no knaar Ministériu Solidariedade Sosiál no Inkluzaun (MSSI) mak kontempla ona iha planu estratéjiku MSSI nian hodi fó protesaun ba sidadaun hotu inklui Ema ho Defisiénsia sira.

“Dadus estatístika 2015 hatudu katak, númeru Ema ho Defisiénsia iha Timor-Leste 3,8% hosi totál populasaun millaun 1,2,” Rui Manuel Gado Exposto hatete ba jornalista sira bainhira partisipa komemorasaun Loron Mundiál Ema ho Defisiénsia ho tema “Timor-Leste mak Ita, Sura Mós Ema ho Fefisiénsia” ne’ebé ADTL hamutuk ho parseiru sira realiza iha Centro Convenções Dili (CCD), kinta ne’e.

Tanba ne’e, nia esplika, VIII Governu liuhosi MSSI hamutuk ho parseiru sira hakarak atu dezenvolve hela Planu Asaun Nasionál (PAN) ba Ema ho Defisiénsia períodu 2021-2025, atu ministériu ida-idak bele konsidera no asegura orsamentu iha sira-nia PAN.

Diretór MSSI ne’e hatutan, MSSI mós dezenvolve hela esbosu dekretu lei kona-ba Konsellu Nasionál Ema ho Defisénsia ne’ebé tinan-tinan fó apoiu ba Institutu Seguransa Sosiál (ISS) sira ne’ebé konsentra ba proteje no pomove direitu Ema ho Defisiénsia.

Jornalista: Osória Marques

Editór: Cancio Ximenes

 

 

 

HAKEREK NO HATÁN

Please enter your comment!
Please enter your name here