Ilustrasaun Violénsia. Imajen/Espesiál

AINARO, 03 dezembru 2020 (TATOLI)–Komandu Polísia Nasionál Timor-Leste (PNTL) munisípiu Ainaro rejista kazu asidente tránzitu no insidente hahú hosi janeiru to’o novembru 2020 hamutuk 94.

Hosi totál ne’e, asidente tránzitu ne’ebé akontese durante fulan-11 nia laran hamutuk 24 no insidente hamutuk 70.

Komandante Polísia Ainaro, Superintendente Polísia Justino Menezes, informa kazu hirak ne’e rezulta ema mate na’in-rua, kanek todan iha 16, kanek Kama’an 35.

“Kauza hosi asidente tanba falta kontrolu hosi motorista sira, hanesan kondúz karreta no motorizada ho kondisaun lanu, kauza seluk mak lori transporte ho velosidade másima. Kauza hirak ne’e mak ami identifika,” Komandante Polísia Ainaro informa iha salaun enkontru administrasaun munisípiu Ainaro, kinta ne’e.

Enkuantu, insidente hosi janeiru to’o agora hamutuk 70, a’as liu mak ofensa integridade fízika simples hamutuk 33, violénsia doméstika 16, no seluktan maibé kazu sira ne’e maioria submete ona ba tribunál.

“Kauza ba insidente sira ne’e mak ekonomia fraku no fatór seluk mak dezempregu. Tanba serbisu laiha entaun loron kalan hemu tua no lanu, ikus mai hamosu problema liuhosi provoka malu. Violénsia doméstika ne’e fatór ekonomia família no seluk mak edukasaun mínimu hodi parte rua la kompriende malu nune’e asuntu kiik bele lori sai problema boot,” Komandante Polísia Ainaro relata.

Maski nune’e,  nia agradese tanba besik tinan ida (durante 2020) seidauk mosu kazu omesidu iha Ainaro rasik.

“Besik tinan-ida ona ami la rejista kazu omesidu, tantu omesidu agravadu no tentativa omesidu. Tinan 2020 konsege realiza julgamentu móvel iha Komandu munisípiu Ainaro dahaat ba kazu hamutuk 50 no hosi totál ne’e ema tama prizaun na’in-hitu no tama prizaun preventiva na’in-tolu, ne’ebé bele dehan katak kazu pendente laiha,” eis Komandante Polísia munisípiu Viqueque ne’e haktuir.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here