Presidente Institutu Nasionál Seguransa Sosiál (INSS) Longuinhos Armando. Imajen/Egas Cristovão

DILI, 03 dezembru 2020 (TATOLI)—Prezidente Institutu Nasionál Seguransa Sosiál (INSS), Longuinhos Armando Leite,  hateten to’o oras ne’e INSS rejista ona empreza hamutuk 350 iha Munisípiu Díli atu asesu ba fundu rekuperasaun ekonómika hafoin Timor-Leste enfrenta Estadu Emerjénsia tanba pandemia COVID-19. 

“Ita loke ona rejistu ba empreza sira-ne’ebé mak hahú iha 4 novembru ba munisípiu 12 inklui Rejiaun Administrativa Espesiál Oé-Cusse Ambeno (RAEOA). Maibé, to’o agora dadus ne’ebé ami rekolla foin mak Dili nian hamutuk 350,” Longuinhos Armando Leite, haktuir ba Agência TATOLI iha nia knaar fatin Caicoli, Dili, foin lalais ne’e.

Prezidente INSS ne’e esplika, hosi númeru ne’e INSS verifika no haruka ona empreza hamutuk 120 ba Ministériu Koordenadór Asuntu Ekonómiku (MKAE) atu submete ba prosesu pagamentu.

“Ami la simu empreza foun maibé rejistu de’it mak empreza ne’ebé durante ne’e rejistadu ona iha INSS,” nia informa.

Kona-ba orsamentu ne’ebé sei selu ba empreza sira, nia dehan, depende ba empreza sira-nia pedidu tanba sei bazea mós ba kalkulasaun hosi empreza ida-idak kona-ba durante surtu COVID-19 ne’e lakon hira.

“Maiória empreza husu Governu halo pagamentu retornu de’it ba sira katak, Governu selu de’it 6%,” nia dehan.

Autoridade INSS ne’e mós simu ona informasaun hosi munisípiu 12 seluk katak, semana daruak fulan ne’e mak foin entrega dadus mai INSS kona-ba empreza hira mak rejista ona atu bele asesu ba fundu COVID-19 hanesan mós ho Munisípiu Dili nian.

“Ita halo ona kontaktu ba munisípiu 12 seluk. Maibé, sira dehan semana daruak dezembru nian mak hatama. Tanba ne’e, ita hein de’it. Bainhira sira hatama mak ita halo prosesu ba sira-nia pedidu no submete kedas ba BNCTL atu halo pagamentu,” Longuinhos subliña.

Entretantu, orsamentu ba rekoperasaun ekonómiku ba empreza sira-nian hamutuk millaun $42 inklui ba operasionál.

Jornalista: Osória Marques

Editór: Câncio Ximenes

HAKEREK NO HATÁN

Please enter your comment!
Please enter your name here