Kondisaun komunidade sira ninia uma, ne’ebé hela besik mota-ninin Bidau hetan estragu hafoin udan-boot no provoka inundasaun sesta lorokraik (13/03). Imajen Tatoli/António Gonçalves

DILI, 03 dezembru 2020 (TATOLI)—Bankada parlamentár Frente Revolusionária Tiimor-Leste (FRETILIN) husu Governu liuhosi Ministériu Obra Públika (MOP) atu halo prevensaun no normalizasaun ba mota ne’ebé ameasa komunidade tanba agora tama ona tempu udan.

“Bankada FRETILIN bolu atensaun ba VIII Governu Konstitusionál, liuliu ba Ministériu Obra públika no Institutu Jestaun Ekipamentu, atu halo prevensaun no normalizasaun ba mota sira-ne’ebé fó ameasa ba populasaun sira-nia uma, sira-nia natar ho ai-horis, molok udan tún no provoka dezastre naturál ho eskala boot,” Xefe Bankada FRETILIN, Deputadu Francisco Miranda Branco, informa liuhosi debate jeneralidade loron datoluk, iha plenária, Parlamentu Nasionál, kuarta ne’e.

Xefe Bankada FRETILIN husu tau atensaun ba iha Aldeia Obrato, Suku Sau, Manatuto Vila ne’ebé konstrusaun barreira iha ponte okos mak sai fali ameasa ba komunidade nia uma ho natar.

Nune’e mós tau atensaun ba Aldeia Lak-Luan, Suku Dotik, Postu Administrativu Alas, ne’ebé ihá inundasaun tinan 2019 sobu komunidade nia uma, nia natar no ai-horis sira.

Observasaun ne’ebé Ajénsia TATOLI nota mak mota ne’ebé kontinua sobu komunidade nia uma mak iha munisípiu Liquiçá hanesan mota Goulara-Loa (entre suku Dato no Maumeta) no mota Laklolema (suku Dato) nomoos mota sira seluk iha munisípiu refere.

Bainira tempu udan komunidade sira-ne’ebé hela besik mota refere sempre moris la seguru tanba korrente hosi rua ne’e maka’as tebes.

Maibé observasaun seluk ne’ebé Ajénsia TATOLI rekolla mak komunidade sira sempre halo uma iha mota-ninin maske Governu bandu ona labele halo uma besik mota-ninin. Impaktu seluk mota kontinua sobu moru tanba projetu ne’ebé kontrui dezde Projetu Pakote Referendum (PPN), Projetu Dezenvolvimentu Distritál I-II (agora Projetu Dezenvolvimentu Integradu Munisipál) ladún iha kualidade.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here