Selebrasaun loron mundiál ema ho defisiénsia ho tema "Timor-Leste Mak Ita, Sura Mós Ema ho Defisiénsia," iha Centro Convenções Dili. Imajen TATOLI/Osória Marques.

DILI, 03 dezembru 2020 (TATOLI)—Diretór Asosiasaun Defisiénsia Timor-Leste (ADTL), Cesário da Silva hateten tempu ona atu instituisaun Estadu presija envolve Ema ho Defisiénsia (EhD) iha prosesu dezenvolvimentu Timor-Leste (TL).

Notísia Relevante: ADTL rekomenda Governu ratifika konvensaun ONU direitu ema ho difisiénsia

Selebrasaun loron mundiál ema ho defisiénsia ho tema “Timor-Leste Mak Ita, Sura Mós Ema ho Defisiénsia,” iha Centro Convenções Dili. Imajen TATOLI/Osória Marques.

“Tempu ona ita-nia Estadu ho Governu Timor-Leste asegura prosesu dezenvolvimentu maibé presiza sura mós ema ho defisiénsia,” Cesário da Silva hateten iha ámbitu selebrasaun loron mundiál ema ho defisiénsia ho tema “Timor-Leste Mak Ita, Sura Mós Ema ho Defisiénsia,” iha Centro Convenções Dili (CCD), Kinta ne’e.

Cesário husu no apela ba ema hotu katak, labele halo diskrimanasaun ba malu tanba ema hotu-hotu presiza kompleta malu, tantu ema ho saúde di’ak no EhD sira.

“Tanba buat ne’ebé ita iha no hatene, nia la hatene, maibé nia hatene buat ne’ebé mak ita la hatene. Ema ida-idak iha nia vantajen no desvantajen rasik ba nia aan no ba ema seluk. Ha’u hanoin, situasaun ida-ne’e mak presiza halo reflesaun no fanu entidade hotu-hotu,” nia esplika.

Diretór ADTL ne’e husu Estadu tenke investe edukasaun ba labarik defisiente sira no ema vulnerável sira, tanba sira merese duni hetan atensaun hosi Estadu.

“Presiza habelar informasaun ba to’o iha manorin sira. Tanba ami preokupa ho polítika nasionál inkluzivu nia implementasaun durante ne’e. Katak, ema hotu-hotu asesu eskola ne’ebé hanesan maibé ami-nia maluk Ema ho Defisiénsia barak mak seidauk asesu edukasaun hanesan ho ema normál sira,” nia hateten.

Cesário husu atu labele hanoin de’it sira-nia defisiénsia no limitasaun ba fíziku ka kondisaun maibé haree mós ba sira-nia abilidade hodi hola parte ba prosesu dezenvolvimentu nian.

Diretór ADTL ne’e hakarak atu Ema ho Defisiénsia sai motivadór no inspiradór  hodi motiva no inspira ema hotu-hotu.

Nia sita,  despaixu hosi Ministériu Obras Públika (MOP) ho nú 7/VIII/2020 katak, atu asegura asesibilidade iha konstrusaun públiku hotu iha TL, nune’e despaixu ne’e bele garante, edifísiu públiku ka empreza privadu sira bele asegura asesibilidade ba Ema ho Defisiénsia sira.

Liuhosi loron mundiál ba EhD, ADTL husu ba na’i ulun sira atu tau atensaun ba Ema ho Defisiénsia no labele husik ema ida iha kotuk.

Notísia Relevante: Governu Konsidera Ejijénsia ADTL Kona-ba Ratifikasaun Konvensaun Direitu EHD

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here