Imajen/Media PR.

DILI, 03 dezembru 2020 (TATOLI)—Gabinete Apoiu Átividade Konjúje Prezidente Repúblika (GAAK-PR) fó treinamentu kona-ba kulinária prepara ai-han lokál no jestaun finanseiru ba inan-feto sira hodi hasa’e sira-nia esperiénsia no koñesimentu iha atividade negósiu.

Treinamentu durante loron rua ne’ebé hahú hosi 02-03 dezembru 2020 ne’e hala’o iha Suku Madohi, Postu Administrativu Dom Aleixo, Munisípiu Dili, hetan partisipasaun másimu hosi inan-feto sira kuaze liu na’in-50 ne’ebé mai hosi Suku Madohi, Comoro, Fatuhada, Kampu Alor, Bebonuk, Manleuana no Bairru-Píte.

Partisipante ida hosi Suku Comoro, Fernanda dos Reis Soares, hateten treinamentu ba loron rua ne’e importante tebes ba inan-feto sira kona-ba oinsá jere orsamentu no prepara ai-han produtu lokál Timor-Leste ba família, turista lokál no internasionál.

Partisipante seluk hosi Aldeia Beto Naroman, Suku Madohi, Zelita de Xena, hatete katak liuhosi treinamentu kona-ba jestaun finanseiru bele hasa’e ona koñesimentu kona-ba negósiu liuliu oinsá bele jere osan ne’ebé mak hetan hosi negósiu loron-loron.

“Hanesan inan ida iha ami-nia uma laran, treinamentu ne’e fó hanoin kle’an liu ba ami feto sira hanesan inan oinsá atu jere osan iha ami nia família. Tanba durante ne’e ami fila-liman iha ami-nia moris loron loron, ami la hatene jere finanseiru iha ami nia uma laran. Durante ne’e ami hatene de’it ema sosa no ami-nia osan fila, ami la hatene kona-ba lukru no gastus. Maibé treinamentu ne’e ami bele komprende liután,” Zelita de Xena haktuir liuhosi komunikadu ne’ebé TATOLI asesu hosi Prezidénsia Repúblika.

Iha parte seluk, inan-feto hosi Aldeia Anin-Fuik suku Madohi, Fernanda de Jesus Soares, agradese tebes ba gabinete espoza nia programa formasaun ba inan-feto negosiante sira, tanba bele ajuda feto maluk sira kona-ba oinsá tein produtu lokál ne’ebé bele fó nutrisaun diak ba família ida-idak liu liu labarik kiik sira.

Entretantu, Reprezenta Autoridade Postu Administrativu Dom Aleixo,  Xefe Suku Madohi Bernardino de Cristo Ferreira “Teki Timur”, lori komunidade nia naran agradese tebes ba Gabinete Espoza Prezidente Repúblika tanba fó ona treinamentu hodi hasa’e koñesementu kona-ba kulinária no jestaun finanseiru.

“Ha’u sente treinamentu ne’e diak tanba ba oin bele iha rezultadu ne’ebé pozitivu ba inan-feto sira.  Tanba ne’e, ba oin tenke aplika iha ita-nia família no ita-nia suku, maske tempu uitoan maibé importante mak tenke hatene no prátika,” nia agradese.

Átividade treinamentu hanesan, antes ne’e Gabinete hala’o tiha ona iha munisípiu seluk hanesan Manatuto, Liquiça, Maliana, Atauro.

Tanba ne’e, ba oin, Gabinete Espoza Prezidente Repúblika sei hala’o formasaun hanesan ba fatin sira iha Estrada ibun, nune’e inan-feto sira oiná prepara ai-han lokál ba vizitante sira.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here